I jepet lamtumira e fundit çiftit shqiptar që u vra në Australi

Komuniteti shqiptar në Melburn i jep lamtumirën e fundit Lindita dhe Veton Musait

Janë përcjellë për në banesën e fundit Lindita dhe Veton Musai, të cilët u qëlluan për vdekje në mëngjesin e 31 dhjetorit 2019 në Jarravill të Melburnit.

Është bërë e ditur se mijëra të pranishëm, shqiptarë, por edhe australianë, erdhën sot në xhaminë shqiptare në Melburn për t’i dhënë lamtumirën e fundit çiftit Musai ose ciftit engjellor, siç u quajt nga mediat australiane gjatë ditëve të fundit, përcjell albinfo.ch.

Sipas informacioneve, thuhet se Veton Musai ishte i punësuar në Bankën Kombëtare Australiane dhe ishte djali i ish-kryetarit të Shoqatës së Komunitetit Shqiptar në Australi, Alil Musai, me origjinë nga Struga e Maqedonisë së Veriut. Vetoni ishte një shqiptaro-australian tipik, i dashur, i rrethuar me miq të shumtë, me pasion për futbollin dhe AFL (Ligen e Futbollit Australian), shkruan “Sbsshqip.

Nga ana tjetër, për Linditen thuhet se ishte një vajzë me zemër të madhe, shoqet e punës thonë se ishte “vajza më e bukur,” “gjithmonë e buzëqeshur” dhe “e dhembshur për të tjerët”.

Po ashtu, mesazhet e ngushëllimeve për familjet e prekura nga kjo tragjedi nuk pushuan së ardhuri jo vetëm nga komuniteti shqiptar që është tronditur thellë nga kjo ngjarje, por edhe nga anëtarë të komunitetit të gjerë australian. Shtëpia e familjes Musai gjatë ditëve të fundit priti vizita ngushëllimi për qindra anëtarë të njohur e të panjohur që nuk ngurruan t’u qëndronin pranë prindërve dhe anëtarëve të tjerë të familjes.

Duhet theksuar se çifti, i cili sapo kishte festuar përvjetorin e parë të martesës, u qëllua me armë nga babai i Lindites, Osman Shaptafaj, 55-vjeçar, i cili më pas u mundua të vrasë vetën. Ai u gjet jo larg nga vendi i krimit me plagë nga armë zjarri në kokë.

Ai emigroi në Australi nga Ulqini i Malit të Zi dhe tashmë ndodhet i shtruar në spital në gjendje kritike dhe nën mbrojtjen e policisë.

Policia është në pritje për të marrë në pyetje të dyshuarin me qëllim identifikimin e arsyeve të mundshme që e shtynë drejt këtij krimi. Policia nuk kërkon asnjë të dyshuar tjetër në lidhje me krimin.

Ajo që dihet është se autori i vrasjes ka kohë që jeton i izoluar dhe në gjendje të rëndë mendore, përcjell albinfo.ch.

---