I refuzohet lirimi nga paraburgimi Kadri Veselit

Keystone (AP Photo/Visar Kryeziu)

Mëngjesin e sotëm paneli i Gjykatës Supreme ka refuzuar kërkesën për mbrojtje të ligjshmërisë lidhur me paraburgimin, të parashtruar nga ana e mbrojtjes së ish-kryeparlamentarit të Kosovës, Kadri Veseli, i cili po akuzohet për krime lufte, përcjell albinfo.ch.

Një muaj më parë, kryetarja e Dhomave të Specializuara të Kosovës (DHSK), Ekaterina Trendafilova, kishte caktuar Panelin e Gjykatës Supreme për të vendosur mbi kërkesën e dorëzuar nga mbrojtja e Kadri Veselit më 29 qershor 2022 lidhur me mbajtjen e tij në paraburgim.

Gjykatësit, të cilët kanë vendosur për këtë kërkesë, janë Ekaterina Trendafilova (kryesuese), Kristine van den Vijngart dhe Mihael Bolander.

Më 29 prill Zyra e Prokurorit të Specializuar ka dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.