Ilaçi Wegovy pritet të vijë në formë tablete, tregu i humbjes së peshës në rritje

Wegovy, një nga ilaçet më të përdorura kundër obezitetit, është miratuar në Shtetet e Bashkuara edhe në formë tablete. Deri tani, medikamenti ishte i disponueshëm vetëm si injeksion. Versioni oral pritet të dalë në tregun amerikan vitin e ardhshëm, ndërsa në Zvicër dhe Evropë mund të jetë i disponueshëm në muajt ose vitet në vijim, pasi aplikimi është në shqyrtim nga Agjencia Evropiane e Barnave (EMA), transmeton albinfo.ch.

Sipas ekspertëve, tableta mund të jetë një alternativë më e përshtatshme për pacientët që shmangin injeksionet, me një efikasitet të krahasueshëm. Megjithatë, marrja e saj kërkon respektimin e rregullave strikte, si përdorimi në mëngjes esëll dhe pa kombinim me medikamente të tjera.

Në Zvicër, Wegovy aktualisht është i disponueshëm vetëm në formë injeksioni dhe rimbursohet nga sigurimi bazë shëndetësor, por vetëm në kushte të rrepta mjekësore. Në vitin 2024, kostot e këtij trajtimi arritën rreth 43 milionë franga zvicerane, ndërsa rreth 40 mijë persona përfituan nga rimbursimi.

Ekspertët paralajmërojnë se shpenzimet mund të rriten ndjeshëm në vitet e ardhshme, duke arritur deri në 300 milionë franga. Ndërkohë, tregu i ilaçeve për humbje peshe po zgjerohet, me produkte të reja si Munjaro që pritet të hyjnë në treg, duke e bërë këtë sektor gjithnjë e më fitimprurës.