In Memoriam: Përkujtohet jeta dhe vepra e Nasuf Naski Abdixhikut

Mbrëmja përkujtimore në Corpataux-Magneden kushtuar artistit Abdixhiku u pasurua me interpretimin e poezisë “Ti dua të gjitha”

Më 11 prill në Corpataux-Magneden, Kantoni Freiburg u mbajt një mbrëmje përkujtimore në nderim të Nasuf Naski Abdixhiku, një personalitet artistik që la gjurmë të thella në jetën kulturore dhe në kujtesën kolektive të komunitetit.

Mbrëmjes i dha një dimension të veçantë emocional interpretimi i poezisë “Ti dua të gjitha” nga regjisori Bekim Guri, duke rikthyer përmes fjalës ndjeshmërinë dhe universin krijues të artistit.

Video: Interpretimi i poezisë “Ti dua të gjitha” nga regjisori Bekim Guri

Gjatë aktivitetit, Abdixhiku u vlerësua si një artist i gjithanshëm, i cili përmes pikturës, aktrimit dhe poezisë ndërtoi jo vetëm vepra artistike, por edhe një botë emocionesh dhe kujtimesh që mbeten të gjalla ndër vite. Ai u përshkrua si një krijues që nuk jepte vetëm kohë, por vetveten, duke e shndërruar artin në një urë të fuqishme komunikimi mes njerëzve.

I lindur në Tërnoc të Madh, në komunën e Bujanocit, ai mbeti i lidhur ngushtë me rrënjët dhe komunitetin e tij. Krahas dimensionit artistik, ai u kujtua edhe për angazhimin e tij human gjatë viteve 1997–1999, kur kontribuoi në organizimin e ndihmave për Kosovën, në një nga periudhat më të vështira për popullin shqiptar.

Në këtë mbrëmje morën pjesë familja më e ngushtë e tij, miq të shumtë, si dhe përfaqësues institucionalë, ndër ta edhe konsulli i Shefi i Misionit Konsullor të Republikës së Kosovës në Cyrih, z. Vigan Berisha.

Trashëgimia e tij artistike dhe njerëzore vijon të jetojë përmes ndikimit të thellë që la pas, si një burim frymëzimi për brezat që vijnë. Nasuf Naski Abdixhiku ndërroi jetë më 9 mars 2024, në moshën 65-vjeçare, si pasojë e një arresti kardiak, duke lënë pas bashkëshorten dhe katër vajzat e tij.

Nasuf Naski Abdixhiku do të kujtohet gjithmonë me mirënjohje dhe respekt.

📸 Foto: RRIM Photo

 

 

---