Iniciativa për familjen, me gjasa të mira për të fituar

64% të zviceranëve do ta votonin iniciativën për familjen ndërsa iniciativa 1:12 do të mbështetej nga 44% e votuesve dhe do të hidhej poshtë po nga 44%

Iniciativa  për familjen, bartëse e të cilës është SVP/UDC, ka gjasa të mira të fitojë shumicën në votimin që mbahet më 24 nëntor. Këtë e tregon një sondazh i realizuar nga instituti për hulumtimin e opinionit publik  gfs.bern. Sipas sondazhit në fjalë, nëse për iniciativën do të votohej në fillim të tetorit, 64% e zviceranëve do të votonin në favor të saj. 25 për qind do të ishin kundër dhe 11% janë shprehur ende të pavendosur.  

Siç mund të merret me mend, në radhët e votuesve të SVP kjo iniciativë gëzon mbështetjen më të madhe, gjegjësisht për të do të votonin 83%. Nga ithtarët e FDP/PLR, pro iniciativës do të ishin 57%, nga CVP/PDC, 59%. Nga Partia Socialdemokrate (SP/PS) 44% janë pro dhe 45% kundër. E ngjashme është gjendja edhe te Partia e Gjelbër: 43% janë në favor të iniciativës dhe 39% kundër saj.

Iniciativa kërkon që të lirohen nga tatimet jo vetëm familjet, për fëmijët e të cilëve kujdeset dikush tjetër por edhe për ato familje që vendosin të kujdesen vetë për fëmijët e tyre.

Iniciativa 1:12 e JUSO-s ka numër të njëjtë përkrahësish dhe kundërshtarësh. Kështu, në rast se votimi do të bëhej në fillim të tetorit 44% do të votonin pro dhe 44% kundër kësaj iniciative, bën të ditur gfs.bern.12% do të ishin me këtë rast të pavendosur.

Marrë sipas përkatësive partiake, nga të Gjelbrit 80% do ta votonin ndërsa 18% nuk do ta votonin këtë iniciativë. Zgjedhësit e SP/PS do të silleshin ngjashëm: 76% pro dhe 20% kundër.

Nga ana tjetër, një përgjigje bindëse negative në një votim të tillë do ta jepnin ithtarët e FDP/PLR-së, gjegjësisht 71% kundër dhe 25% pro. SVP/UDC do të votonte me 62% kundër dhe 31% pro. CVP/PDC në një rast të tillë do ta kundërshtonte iniciativën 1:12 në shkallën 55% dhe do ta votonte me 33%.

I njëjti institut ka bërë sondazh edhe për përqindjen e personave me të drejtë vote që do të marrin pjesë në votimet e 24 nëntorit. Rezultatet tregojnë se 47% kanë thënë se me siguri do të votojnë, ndërsa 31% janë shprehur se më shumë ka gjasa të votojnë se të mos votojnë