Ish “Miss Fotozhenia”, tash mbrapa kamerës, si fotografe

E zgjedhur si Miss Fotozhenia e Shqipërisë, Xheni Çuni studion regjinë në Düsseldorf dhe merret me fotografi

Akademia e Arteve e qytetit Düsseldorf, është një ndër institucionet më me renome të artit në Gjermani. Nga ky tempull i artit, i themeluar në vitin 1773, dolën shumë artistë të njohur gjermanë. Akademia ekspozon disa herë në vit punimet e studentëve të saj në lëmenj të ndryshëm. Një ndër ekspozitat e këtij institucioni ku tregohet kreativiteti i studentëve të tij, është edhe ekspozita “Rundgang” ku studentët do të kenë rastin të ekspozojnë fotografitë e tyre.

Pjesë e kësaj ekspozite e cila ka hapur dyert e saj më 26 janar për herë të parë do të jetë edhe fotografja e talentuar shqiptare Xheni Çuni.

Si studente e vitit të tretë të degës së regjisë, fotografja Çuni prezanton disa nga fotografitë e saj të cilat janë vlerësuar shumë lartë nga docentët e kësaj Akademie. Edhepse studion në degën e regjisë, pasion i studentes së lindur në Fier është fotografia.

Fotografia e kishte përcjellur Xheni Çunin gjatë gjithë jetës. Në Turqi ku ishte shpërngulur si katërvjeçare, ajo pati përvojën e parë me fotografi, por si modele, para kamerave. Garat për Miss Shqipëria 2010 e sollën atë prapë në atdhe. E zgjedhur si Miss Fotozhenia, Xheni Çuni prezantoi Shqipërinë në arenën ndërkombëtare duke vazhduar punën e saj, gjithmonë para kamerave, si modele e reklamave dhe videospoteve të ndryshme.

Dëshirën për të ndërruar anët dhe për të dalë prapa kamerës, ajo e kishte qysh moti. “Fotografitë e para ishin ato të njerëzve të mi të dashur, ato të familjes sime” tregon Xheni Çuni për ditët e para të saj si fotografe. “Ndoshta nga ato fotot e para kam zbuluar edhe pasionin për të fotografuar njerëzit. Të fotografuarit e njerëzve ka të bëjë gjithmonë me ndjenja sepse kur njerëzit dalin para kamerës, janë në gjendje të ndryshme shpirtërore” flet fotografja e re e cila tashmë ka pasur disa suksese në karrierën e saj të re. Vitin e kaluar edicioni italian i revistës “VOGUE”, botoi në faqet e saj fotografi të fotografes shqiptare.

Edhe puna si dizajnere grafike në televizionin shtetëror WDR, tregon kreativitetin e Xheni Çunit e cila kur flet për të ardhmen e saj ende nuk duket të jetë e përcaktuar se a do të merret me regji apo me fotografi. “I dua edhe regjinë edhe fotografinë dhe do të mundohem të punoj gjithnjë në të dy drejtimet” flet e ambicionuar Xheni Çuni dhe shton se ka shumë plane për të ardhmen. “Sa herë që arrij një qëllim, menjëherë mendoj për qëllime e plane tjera” përfundon ajo e lumtur që është pjesë e kësaj ekspozite që nuk do të jetë e vetmja në këtë vit. Ndër të tjerash, ajo planifikon të jetë pjesë edhe e një ekspozite me fotografë shqiptarë.

Regjisore apo fotografe?

Edhe puna si dizajnere grafike në televizionin shtetëror WDR, tregon kreativitetin e Xheni Çunit e cila kur flet për të ardhmen e saj ende nuk duket të jetë e përcaktuar se a do të merret me regji apo me fotografi. “I dua edhe regjinë edhe fotografinë dhe do të mundohem të punoj gjithnjë në të dy drejtimet” flet e ambicionuar Xheni Çuni dhe shton se ka shumë plane për të ardhmen.