Izraeli është pajtuar për një armëpushim me Libanin

Izraeli ka rënë dakord për një armëpushim me Libanin, raportoi sot televizioni izraelit Channel 12, duke hapur rrugën për përfundimin e një konflikti midis Izraelit dhe Hezbollahut të Libanit,që shkaktoi vdekjen e mijëra njerëzve.

Marrëveshja pritet të hyjë në fuqi nesër. Raporti i “Channel 12” pasoi një takim të kabinetit të sigurisë të Izraelit nën drejtimin e kryeministrit Benjamin Netanyahu, i mbledhur për të diskutuar marrëveshjen e armëpushimit, përcjell Albinfo.ch.

“Miratimi i marrëveshjes nga Izraeli do të hapë rrugën për një deklaratë armëpushimi nga presidenti amerikan, Joe Biden dhe presidenti francez, Emmanuel Macron”, sipas katër burimeve të larta libaneze.

Pavarësisht progresit diplomatik, armiqësitë u ndezën ndërsa Izraeli rriti në mënyrë dramatike fushatën e tij të sulmeve ajrore në Bejrut dhe në pjesë të tjera të Libanit.

Kryeministri izraelit, Benjamin Netanyahu tha sot se po i kërkon qeverisë së tij të miratojë një armëpushim me Hezbollahun në Liban. Ai premtoi se lufta e Izraelit në Gazë do të vazhdonte

Netanyahu tha se sulmet e Izraelit ndaj Libanit e kishin “zvarritur Hezbollahun për dekada” dhe se ishte koha për t’u fokusuar në Gazë dhe për të “intensifikuar” presionin ndaj Hamasit.

Ai tha gjithashtu se armëpushimi në Liban do të lejonte Izraelin të përqendrohej në kërcënimin iranian dhe se armëpushimi do të përshpejtonte dërgimin e vonuar të armëve nga SHBA-ja.

Duke folur në një fjalim televiziv pasi mori mbështetjen për armëpushimin nga kabineti i tij i sigurisë, kryeministri izraelit tha se do t’u kërkonte të gjithë ministrave të tij miratimin e tyre sot në mbrëmje.

Parlamenti i Libanit pritet të mblidhet nesër në mëngjes për të diskutuar marrëveshjen.

Zyrtarët amerikanë dhe arabë thanë se armëpushimi fillimisht do të jetë 60 ditë dhe se forcat izraelite do të tërhiqeshin nga Libani jugor.

Netanyahu tha se kohëzgjatja e armëpushimit do të varej nga ajo çfarë ndodhte në Liban.

“Hezbollahu ka rënë dakord t’i japë fund pranisë së tij të armatosur përgjatë kufirit dhe të lëvizë armët e rënda në veri të lumit Litani”, thanë burimet.

Ushtria libaneze pritet të vendoset në Libanin jugor, me të paktën 5 000 trupa të vendosura për të patrulluar zonën kufitare së bashku me një forcë ekzistuese paqeruajtëse të OKB-së.

Një komitet ndërkombëtar, duke përfshirë SHBA-në dhe Francën, do të krijohet për të mbikëqyrur zbatimin e marrëveshjes së armëpushimit dhe Rezolutës 1701 të Këshillit të Sigurimit të OKB-së, e cila i dha fund luftës së fundit të madhe midis Hezbollahut dhe Izraelit në 2006.

Hezbollahu ende nuk ka komentuar mbi marrëveshjen. Presidenti i SHBA-së, Joe Biden do të flasë sot në mbrëmje.

Një zyrtar i lartë amerikan tha se Izraelit nuk do t’i jepet e drejta për të sulmuar Libanin bazuar në ndonjë lëvizje të dyshimtë./Albinfo.ch/

---