Jahjaga nderohet me çmimin “Clinton Global Initiative”

Ish sekretarja e Shtetit, Madeleine Albright ia dorëzoi presidentes Atifete Jahjaga çmimin për “Lidership...” nga “Clinton Global Initiative”. Jahjaga tha se çmimi shkon për popullin e Kosovës

Presidentja e Republikës së Kosovës, Atifete Jahjaga, është nderuar me çmimin për “Lidership në sferën publike” nga “Clinton Global Initiative”. Ndarja e këtij çmimi është bërë në një gala mbrëmje organizuar në Nju Jork, ndërsa ish-sekretarja e Shtetit, Madeleine Albright ia dorëzoi Jahjagës këtë çmim.

Në këtë mbrëmje ishte i pranishëm ish-presidenti amerikan, Bill Clinton, bashkëshortja e tij, ish-Sekretarja e Shtetit, Hillary Clinton dhe e bija e tyre, Chelsea Clinton dhe shumë personalitete të tjera të politikës, artit, kyçurës por edhe nga institucionet amerikane, pore dhe nga Evropa.

“Zotëri President, Zonja Sekretare, e konsideroj këtë nder, këtë çmim të veçantë shpërblim për njerëzit e Kosovës, jetët e të cilëve ju i keni prekur dhe ndryshuar përjetë përmes vendimit tuaj të parandaloni gjenocidin në Kosovë, dhe duke na qëndruar pranë që atëherë për të na ndihmuar ta ndërtojmë shtetin tonë në paqe, të lirë, demokratik”, tha në fillim presidentja Jahjaga.

Ndërtimi i paqes, sipas saj, nuk ka qenë i lehtë.

“Pesëmbëdhjetë vjet më parë, Kosova ishte një vend i mbuluar me rrënoja. Jetët ishin të thyera në mijëra fragmente. Familjet ishin të ndara. Shumë prej tyre përjetësisht. Lidhjet në mes të komuniteteve ishin të grisura”, deklaroi Jahjaga në marrjen e çmimit.

Sipas presidentes, nga ky hi, dhe nga këto momente të dhimbjes, një vendosmëri, një vullnet i fortë, e jo dëshpërimi, rilindi. “Por nga hiri dhe nga ato momente dhembje, një vendosmëri, një vullnet i pashoq – dhe jo dëshpërim – u shfaq. Ne ishim të vendosur të ecnim tutje, të ndërtojmë një Kosovë tjetër”, tha ajo.

Para pesëmbëdhjetë vitesh, Kosova sipas saj, ishte vend i mbuluar nga gërmadhat. “Jetët ishin thyer në mijëra copë. Familjet ishin ndarë. Shumë prej tyre përjetësisht. Lidhjet mes komuniteteve etnike ishin shkatërruar plotësisht. Sot Kosova frymon në liri dhe në paqe dhe me vetëbesim po e trason vizionin e saj të anëtarësimit në Bashkimin Evropian dhe NATO”, deklaroi ajo.

Përveç presidentes kosovare, në këtë mbrëmje u nderua edhe aktori i njohur Leonardo DiCaprio, për përpjekjet e tij dhe donacionet e dhëna në mbrojtje të ambientit.