Japonezet, rekord në jetëgjatësi

Gratë japoneze kanë zënë vendin e parë për mesataren e jetës së tyre, 26 vjet rresht. pas një "pauze" të kushtëzuar nga cunami (2011), ato sërish janë më jetëgjatat

Japonezët, dhe sidomos japonezet,njihen për jetëgjatësinë e tyre. Me një mesatare prej 86.61 vjet, gratë e Japonisë edhe në vitin 2013 kanë qenë në krye të listës botërore. Siç bën të ditur ministria e shëndetësisë e këtij vendi të largët, japonezet kanë kryesuar këtë listë edhe një vit më parë por edhe shumë vite të tjera më parë, plot 26 vite. Me një përjashtim: në vitin 2011, pas cunamit që pati goditur shtetin ishull në lindje të Azisë, ky trend qe ndërprerë. Mesatarja ishte çrregulluar si pasojë e vdekjes së 18500 personave.

Në përgjithësi mesatarja e lartë vjen si rezultat i përmirësimit të shanseve të shërimit nga sëmundjet si kanceri dhe sëmundjet e zemrës dhe të mushkërive, shpjegojnë në ministrinë japoneze.
Në kategorinë e grave, vendin e dytë për jetëgjatësi e mbajnë gratë e Hong Kongut, me mesataren 86.57 vjet ndërsa të tretin e kanë spanjollet me 85.13 vjet.

Sa u përket meshkujve, më jetëgjatët janë ata të Hong Kongut. Mesatarja e jetës së tyre është 80.87 vjet ndërsa menjëherë pas tyre vijnë burrat nga Islanda, që mesatarisht jetojnë 80.8 vjet.
Ndryshe nga shumë ranglista tjera ku zviceranët janë mësuar ta shohin veten të parët, në rastin e jetëgjatësisë ata duhet të kënaqen me vendin “modest” të shtatë, si femrat ashtu dhe meshkujt. Gratë zvicerane këtë pozitë e kanë arritur me mesataren jetësore 84.71 vjeç ndërsa meshkujt me 79.99.