Jasharaj paralajmëron greva pas 9 shkurtit, nëse kërkesat nuk përmbushen nga qeveria e re

Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, ka paralajmëruar se kjo sindikatë do të kërkojë të drejtat e mësimdhënësve nga çdo qeveri, madje theksoi se nëse kërkesat nuk përfillen, do të pasojnë greva dhe protesta në arsim.

Në një intervistë për Ekonominë Online, Jasharaj ka thënë se cilindo subjekt politik që vjen në pushtet, Sindikata do ta konsiderojë që është vullnet i popullit dhe do të tentojë që të komunikojë dhe të ketë dialog me të.

“Ne do t’i kërkojmë të drejtat tona dhe nëse nuk i realizojnë, le ta dinë se prapë do të ketë greva e protesta nga SBASHK-u, nëse kërkesat tona nuk përfillen nga qeveria që do të vijë nga zgjedhjet e 9 shkurtit”, paralajmëroi ai.

Jasharaj ka deklaruar se Sindikata po ndjek me vëmendje fushatën e zgjedhjeve të 9 shkurtit 2025, duke shtuar se është i gatshëm të bashkëbisedojë me të gjitha partitë garuese.

Ai ka potencuar se ka premtime për rritje pagash dhe një qasje më pozitive ndaj sindikatave.

Sipas tij, vitet e fundit nën qeverisjen e Kurtit kanë qenë të vështira për sindikatat, pasi kanë munguar dialogu dhe bashkëpunimi.