Java e punës me 4 ditë po jep efekte në Islandë

Në vitin 2023, ekonomia e Islandës u zgjerua me 5%, me normën e dytë të rritjes pas asaj të Maltës ndër ekonomite e pasura evropiane

Ekonomia e Islandës po tejkalon pjesën më të madhe të homologëve evropianë pas vendosjes së një jave më të shkurtër pune pa reduktim page. Ndërmjet viteve 2020 dhe 2022, 51% e punëtorëve në vend kishin pranuar ofertën e orëve më të shkurtra të punës, duke përfshirë një javë katërditore, sipas instituteve, duke thënë se shifra mund të jetë edhe më e lartë sot, shkruan Scan, transmeton albinfo.ch.

Vitin e kaluar, Islanda regjistroi rritje ekonomike më të shpejtë se pjesa më e madhe e vendeve evropiane dhe shkalla e saj e papunësisë është një nga më të ulëtat në Evropë, vuri në dukje Instituti i Autonomisë në Mbretërinë e Bashkuar dhe Shoqata e Islandës për Qëndrueshmëri dhe Demokraci. “Ky studim tregon një histori të vërtetë suksesi. Orët më të shkurtra të punës janë përhapur gjerësisht në Islandë dhe ekonomia është e fortë në një numër treguesish,” thanë studiuesit.

Gjatë dy provave të mëdha midis 2015 dhe 2019, punonjësit e sektorit publik në Islandë punonin 35-36 orë në javë, pa ulje të pagës. Shumë pjesëmarrës kishin punuar më parë 40 orë në javë. Provat përfshinin 2,500 njerëz, më shumë se 1% të popullsisë që punonte në Islandë në atë kohë, dhe kishin për qëllim ruajtjen ose rritjen e produktivitetit duke përmirësuar ekuilibrin punë-jetë.

Studiuesit zbuluan se produktiviteti mbeti i njëjtë ose u përmirësua në shumicën e vendeve të punës, ndërsa mirëqenia e punëtorëve u rrit “dramatikisht”, nga stresi i perceptuar dhe lodhja nga ngarkesa, deri te ekuilibri shëndet-jetë. Pas provave, sindikatat islandeze negociuan reduktimin e orëve të punës për dhjetëra mijëra anëtarë të tyre në të gjithë vendin.

Në vitin 2023, ekonomia e Islandës u zgjerua me 5%, me normën e dytë të rritjes pas asaj të Maltës ndër ekonomite e pasura evropiane, sipas Fondit Monetar Ndërkombëtar. Kjo është shumë më e lartë se norma mesatare e rritjes së vendit prej gati 2% në dekadën midis 2006 dhe 2015.

Megjithatë, Fondi parashikon rritje pak më të ngadaltë në Islandë këtë vit dhe vitin e ardhshëm, kryesisht për shkak të ngadalësimit të shpenzimeve turistike.

---