Jep dorëheqje ministri i Shëndetësisë në Maqedoninë Veriore

Ai tha se ka ofruar dorëheqje si përgjegjësi morale për ngjarjen tragjike në Tetovë

Venko Filipçe në konferencë për shtyp njoftoi se është dorëhequr nga pozita e ministrit të Shëndetësisë në Maqedoninë Veriore.

Ai tha se ka ofruar dorëheqje si përgjegjësi morale për ngjarjen tragjike në Tetovë, raportojnë mediat shqiptare, përcjell albinfo.ch.

Filipçe tha se tragjedia në Tetovë e ka prekur shumë dhe e ndjen të nevojshme të largohet nga pozita e ministrit të Shëndetësisë.

“Tragjedia e fundit në Tetovë më ka prekur shumë, më vjen keq për viktimat, ngushëllime për familjet e tyre. Nuk kam fjalë ta përshkruaj këtë dhe s’ka mënyra për kompensim”, tha Filipçe.

Të tjerat dorëheqje

Ndryshe, përveç Filipçes, sot nga pozitat e tyre u larguan edhe zv.ministri i Shëndetësisë, Ilir Hasani dhe dy drejtorët e Spitalit Klinik të Tetovës, Florin Besimi dhe Artan Etemi.

Zv.ministri i Shëndetësisë, Ilir Hasani, ka njoftuar se është dorëhequr nga pozita e tij për arsye morale.

Ai thotë se edhe përkundër faktit që nuk ka lidhje me këtë ngjarje, dorëheqja është akti më i vogël që mund ta bëjë.

Ndryshe, para tij dorëheqje njoftuan drejtori i Spitalit Klinik të Tetovës, Florin Besimi, si dhe drejtori ekonomik i po të njëjtit spital, Artan Etemi.

Në një postim në Facebook, Besimi shkruan se për shkak të përgjegjësisë morale, ai jep dorëheqje nga pozita e drejtorit të Spitalit Klinik të Tetovës.

 

---