“Jokeri” rikthehet me aktorin Joaquin Phoenix

Personazhi famëkeq “Joker”, do të kthehet në ekranet e kinemave botërore, pasi rolin e tij do ta luajë aktori i njohur Joaquin Phoenix. Në trilerin e filmit, të publikuar të mërkurën nga studioja filmike “Warner Bros”, aktori Phoenix shihet se është dashur të bëjë ndryshime të mëdha fizike, duke humbur peshë për të luajtur rolin e Jokerit, të cilin për herë të fundit e portretizoi aktori Jared Leto.

Palaçoja, në fillim të filmit, kalon në një periudhë të vështirë, e cila e detyron atë të shndërrohet në një personazh të keq të qytetit të Gothamit.

Filmi vjen në një kohë të vështirë për studion filmike “Warner Bros”, e cila ka dështuar të krijojë universin e vet filmik, siç e ka studioja rivale “Marvel”. Studioja pati sukses të madh në vitin 2008, me realizimin e filmit “Dark Knight”, në trilogjinë e Batmanit.

Rolit të Jokerit i dha famë të madhe aktori Heath Ledger, i cili luajti këtë rol vetëm në një pjesë të filmit për Batmanin, i cili u realizua më 2008. Ai vdiq pak muaj pas publikimit të filmit. Jokeri është personazh i krijuar nga Bill Finger, Bob Kane dhe Jerry Robinson. Ai debutoi në librat komikë për Batmanin.