Ka mbërritur në Viti donacioni nga Zvicra

Ekipi i zjarrfikësve të Vitisë ka pranuar nga Zvicra një automjet për zjarrfikje. Në kuadër të këtij donacioni zjarrfikësit zviceranë, Rolf Hefti, Bruno Bauen dhe Bashkim Bislimi, kanë dhuruar edhe uniforma zjarrfikësish dhe pajisje të tjera për zjarrfikësit e komunave Gjilan e Ferizaj.

“Falënderojmë miqtë tanë nga Prattelini i Zvicrës, të cilët për herë të tretë po sjellin donacione për Shërbimin e Zjarrfikjes dhe Shpëtimit në Viti. Unë i kam vizituar ata personalisht edhe në Zvicër dhe e kam parë aty një punë profesionale të tyre, si në organizimin e mbrojtjes civile, por edhe të njësisë së zjarrfikësve dhe ata nuk janë vetëm një model për neve, por edhe për të gjithë shtetet e BE-së për organizim të tillë”, u shpreh kryetari Haliti.

Ai tha se të gjitha donacionet që i janë dhanë Njësisë së Zjarrfikësve dhe Shpëtimit në Viti nuk do të jenë vetëm në shërbim të qytetarëve vitias, por edhe të komunave për rreth, pasi që në rast nevoje njësitë e zjarrfikësve ndihmojnë komunat partnere.

Kurse ky donacion është mundësuar falë përkushtimit të zjarrfikësve zviceranë Rolf Hefti, Bruno Bauen, Bashkim Bislimi si dhe kompanisë SI Group, përcjell albinfo.ch lajmin e mediave lokale.

E kryetari i Komunës, Haliti, në shenjë falënderimi për këtë donacion u ka ndarë mirënjohje tre zjarrfikësve zviceranë.