Ka nisur Simpoziumi i 7-të i Lidhjes së Mjekëve Shqiptarë të Zvicrës

Nën moderimin e Fatmir Spahiut – Bufit, simpoziumi trajton rolin e mjekut mes klinikës, ekonomisë dhe së drejtës, ndërsa në fund mbahet Kuvendi i 4-të zgjedhor

Sot ka nisur Simpoziumi i 7-të i Lidhjes së Mjekëve Shqiptarë të Zvicrës (LMSHZ), një ngjarje e rëndësishme që ka mbledhur mjekë shqiptarë nga vende të ndryshme për të diskutuar sfidat dhe zhvillimet aktuale në profesionin e mjekësisë, shkruan albinfo.ch.

 

 

Simpoziumi po zhvillohet nën moderimin e artistit të njohur Fatmir Spahiu – Bufi, ndërsa tema qendrore e këtij edicioni është: „Mjeku mes Klinikës, Ekonomisë dhe së Drejtës”, një temë që prek realitetin e përditshëm të profesionistëve shëndetësorë dhe sfidat ndërdisiplinore me të cilat përballen.

 

 

Me këtë rast, kryetari i LMSHZ-së, Dr. Mentor Bilali, iu drejtua mjekëve të pranishëm me një fjalë përmbledhëse, ku foli për punën dhe angazhimin e tij gjatë mandatit si kryetar i Lidhjes, si dhe për rëndësinë e vazhdimit të bashkëpunimit profesional dhe forcimit të rolit të mjekëve shqiptarë në Zvicër.

 

Në përmbyllje të simpoziumit, LMSHZ do të mbajë edhe Kuvendin e 4-të zgjedhor, ku pritet të zgjidhet udhëheqësia e re dhe organizata të ketë një kryetar të ri për mandatin e ardhshëm./Albinfo.ch

 

 

 

---