Kanadaja i përgjigjet Trump-it për refugjatët: “Mirë se vini në Kanada!”

Kryeministri i Kanadasë, Justin Trudeau, konfirmoi gatishmërinë e vendit të tij për të pranuar refugjatë, “pavarësisht besimit të tyre”, një ditë pas vendimit të Shtëpisë së Bardhë për të ndaluar hyrjen në SHBA për qytetarët e shtatë vendeve myslimane.

“Të gjithë ata që largohen nga persekutimi, terrori dhe lufta, e di se Kanadaja do t’i pranojë, pavarësisht besimit tuaj”, ka shkruar në Twitter Trudeau. “Forca jonë është në diversitet. Mirë se vini në Kanada!”, shtoi Trudeau, përcjell albinfo.ch.

Ai nuk ka komentuar mbi vendimin e Shteteve të Bashkuara direkt, por një mesazh në Twitter postoi një ditë pasi presidenti amerikan, Donald Trump, nënshkroi një dekret ekzekutiv që në tre muajt e ardhshëm të ndalojë hyrjen në vendin e tij të qytetarëve të shtatë vendeve myslimane, Irak, Iran, Libi, Somali, Sudan, Siria dhe Jemeni.

Kryeministri i Kanadasë në dhjetor të vitit 2015 personalisht ka mirëpritur refugjatët e parë sirianë.

Kanadaja ka marrë më shumë se 35.000 refugjatë sirianë.