Kancelari gjerman mbështet planin e paqes në Gaza

(KEYSTONE/DPA/Ronny Hartmann)

Kancelari gjerman, Friedrich Merz, deklaroi sot se qeveria e tij do të ofrojë mbështetje politike dhe financiare për planin e paqes në Gaza, të propozuar nga presidenti amerikan, Donald Trump.

“Ne e mirëpresim iniciativën e paraqitur dje nga presidenti Trump,” tha Merz gjatë një konference për shtyp në Berlin, duke theksuar se qeveria gjermane ka pasur kontakte të ngushta me partnerët ndërkombëtarë për këtë çështje gjatë javëve të fundit.

“Pas pothuajse tre vitesh konflikti dhe gjakderdhjeje, ky plan ofron mundësinë më të mirë deri tani për të sjellë fundin e dhunës. Mbështetja e Izraelit për këtë iniciativë është një hap i rëndësishëm përpara,” shtoi kancelari.

Ai bëri thirrje që grupi palestinez, Hamasi, të pranojë planin dhe të krijojë rrugën drejt paqes. “Ky është hapi vendimtar i nevojshëm, dhe unë i bëj thirrje Hamasit që të bashkëpunojë në mënyrë që të hapet rruga për një paqe të qëndrueshme në rajon,” tha Merz.

Kancelari gjithashtu falënderoi presidentin Trump, aktorët kryesorë rajonalë dhe vendet arabe për rolin e tyre dhe për mbështetjen e dhënë për zbatimin e planit. Ai nënvizoi se Gjermania është e gatshme të ndihmojë në këtë iniciativë dhe riafirmoi angazhimin e Berlinit për një zgjidhje me dy shtete për konfliktin izraelito-palestinez.

“Nëse arrihet një marrëveshje, Gjermania do të ofrojë mbështetje për zbatimin e saj, përfshirë ndihmën politike, humanitare dhe ndihmën për rindërtimin e rajonit,” tha Merz. “Qëllimi ynë është një Lindje e Mesme ku izraelitët dhe palestinezët të jetojnë në paqe dhe siguri përmes dy shteteve,” përfundoi kancelari gjerman.