Kaos në aeroportet evropiane: Anulohen gjysma e fluturimeve pas sulmit kibernetik

Keystone EPA/ALEJANDRO GARCIA

Të dielën, pasagjerët në disa nga aeroportet më të mëdha të Europës u përballën me vonesa dhe anulime masive, si pasojë e një sulmi kibernetik që preku sistemet e regjistrimit të fluturimeve.

Në Aeroportin e Brukselit, autoritetet konfirmuan se rreth 50% e fluturimeve u anuluan për të shmangur radhët e gjata dhe kaosin në terminale. Edhe Eurocontrol kërkoi nga linjat ajrore të reduktojnë trafikun drejt dhe nga kryeqyteti belg deri të hënën.

Probleme u raportuan gjithashtu në Londër (Heathrow) dhe në Berlin (Brandenburg), ku udhëtarët u detyruan të presin gjatë. British Airways arriti të kalojë në një sistem rezervë dhe të vazhdojë fluturimet normalisht, ndërsa shumë kompani të tjera ende përballen me vështirësi.

Sulmi kibernetik ka pasur në shënjestër softuerin Muse, të përdorur për check-in dhe dorëzimin e bagazheve nga një numër i madh linjash ajrore. Hetimet vazhdojnë, ndërsa Collins Aerospace – kompania që e menaxhon sistemin – ende nuk ka dhënë detaje mbi natyrën e sulmit.

Komisioni Evropian tha se po ndjek situatën me kujdes dhe se deri tani nuk ka indikacione për një rrezik më të gjerë. Në Irlandë, ndikimi ishte i kufizuar, pasi disa linja kaluan në regjistrim manual. EasyJet dhe Ryanair, që nuk përdorin Muse, deklaruan se po operojnë normalisht.

Ekspertët e sigurisë kibernetike paralajmërojnë se incidenti nxjerr në pah sërish dobësinë e industrisë së aviacionit ndaj sulmeve dixhitale. Ende nuk ka prova të qarta mbi autorët, por dyshohet për grupe të lidhura me Moskën ose për rrjete kriminale që synojnë përfitime financiare.