Kapet kosovari me një sasi të madhe dopingu

Atij i janë gjetur në makinë gjithsej 275 ampula me anabolikë dhe steroidë që kushtojnë rreth 9000 euro

Në autostradën A8 të Austrisë, policia ka kontrolluar një makinë, në të cilën ndodheshin një shtetas kosovar dhe një malazez, që të dy me qëndrim të rregullt në Austri. Në makinë, brenda një çante sportive, policët kanë gjetur një sasi të madhe mjetesh dopingu, gjegjësisht anabolikë  dhe asteroide.

Bëhet fjalë gjithsej 275 ampula që kushtojnë rreth 9000 euro, shkruan “salzburg24.at.

Shoferi (kosovari 29 vjeçar) ka pranuar vetëm se fjala është për “preparate plotësuese për sportistë”. Ndërsa policët e kanë konfiskuar çantën me artikuj dopingu dhe e kanë arrestuar kosovarin, i cili ishte duke udhëtuar në drejtim të Munihut, Gjermani.

Ai mund të akuzohet për shkelje të ligjit për lëndët narkotike. Zyra kompetente e doganës në Munih ka nisur hetimet.