Katër të vdekur dhe 14 të plagosur, në sulmin që Turqia e quan “terrorist”

Foto: Anadolu Agency

Një shpërthim në selinë e “Turkish Aerospace Industries” (TUSAS), pranë kryeqytetit Ankara, vrau të paktën katër persona, tha të mërkurën presidenti turk, Rexhep Tajip Erdogan.

Sulmi gjithashtu la të plagosur 14 të tjerë të mërkurën, tha ministri i Brendshëm. Ali Yerlikaya e quajti atë një “sulm terrorist” në një postim në Twitter, duke shtuar se dy “terroristë u neutralizuan”. Yerlikaya dënoi atë që ai e përshkroi si një “sulm të urryer”.

“Unë e dënoj këtë sulm të tmerrshëm terrorist”, tha Erdogan, në margjinat e një samiti të BRICS në Kazan, Rusi.

Sipas Anadolu Agency të Turqisë, pas shpërthimit ka pasur të shtëna. Anadolu tha se punonjësit e kompanisë gjetën  siguri në bunkerë dhe zona u rrethua.

TUSAS është një zhvillues dhe prodhues i sistemeve të hapësirës ajrore, siç janë avionët luftarakë dhe dronët. Faqja e internetit e kompanisë thotë se është një prodhues i licencuar për avionët luftarakë F-16 të projektuar nga SHBA-ja.

Pamjet nga skena e transmetuara nga mediat lokale fillimisht treguan re të mëdha tymi të zi dhe një zjarr të madh që shpërtheu në vendin në Kahramankazan, një qytet i vogël, rreth 40 kilometra në veri të kryeqytetit Ankara.

Televizioni privat turk NTV tha se një grup sulmuesish mbërritën në hyrjen e kompleksit brenda një taksi gjatë ndryshimit të personelit të sigurisë.

Të paktën një nga sulmuesit shpërtheu një bombë, ndërsa sulmuesit e tjerë arritën të hynin në kompleks, raportoi NTV./DW