Kazinotë ilegale në internet janë në rritje në Zvicër

Shumica e ofruesve të lojërave të fatit të paligjshëm në internet e kanë origjinën nga Gjibraltari dhe Malta

Autoritetet zvicerane kanë bllokuar pothuajse 2000 kazino të paligjshme në internet që nga viti 2019.

Bordi Federal i Lojërave thotë se numri i faqeve të internetit të lojërave të fatit është në rritje dhe veçanërisht problematik për të varurit nga bixhozi, shkruan swissinfo.ch, transmeton albinfo.ch.

Thomas Fritschi, Shefi i Sekretariatit të Bordit Federal të Lojërave, nuk mund të thotë se sa prej këtyre kazinove online të palicencuara ekzistojnë në të vërtetë. “Ne dyshojmë se kemi identifikuar vetëm majën e ajsbergut. Ne nuk kemi ndonjë shifër konkrete apo edhe një hartë të situatës për gjithë Zvicrën”, tha ai për televizionin publik zviceran, SRF.

Qeveria federale zvicerane dhe kantonet janë bashkërisht përgjegjës për luftimin e lojërave të fatit të paligjshëm, gjë që i bën hetimet më të vështira dhe rrit ngarkesën e punës. Në parim, është më e vështirë të merren masa kundër lojërave të fatit të paligjshëm në internet sesa kundër lojtarëve të paligjshëm të pokerit në bare apo oborre të shtëpisë. “Fakti i thjeshtë është se hapja e një uebsajti të ri të paligjshëm është shumë më e lehtë sesa mbyllja e një faqe interneti të paligjshme”, tha Fritschi.

Shumica e ofruesve të lojërave të fatit të paligjshëm në internet e kanë origjinën nga Gjibraltari dhe Malta. Arsyeja është se “kompanitë atje funksionojnë legalisht. Me fjalë të tjera, është një kompani ligjore, për shembull në Maltë ose Gjibraltar, që ka një ofertë online që arrin edhe në Zvicër”, tha Fritschi. “Këtu është e paligjshme. Ne e bllokojmë këtë faqe, por nuk mund t’i ndjekim penalisht autorët”.

E gjithë kjo ka pasoja të drejtpërdrejta edhe për sistemin zviceran të sigurimeve shoqërore. Në ndryshim nga kazinotë legale, ato ilegale nuk paguajnë asgjë në sistemin e sigurimeve shoqërore. Studimet vlerësojnë se shteti humb mbi 200 milionë CHF (235 milionë dollarë) në vit nha kjo.

 

---