Kearns i reagon Hovenier për nxitjen e tensioneve: Ku është ekuilibri?

Foto FB: Xhelal Sveçla

Kryesuesja e Komisionit për Punë të Jashtme në Parlamentin e Britanisë së Madhe, Alicia Kearns, i ka reaguar ambasadorit të SHBA-së në Kosovë, Jeffrey Hovenier pasi ky i fundit akuzoi autoritetet e Kosovës se po nxisin tensione.

“Ku është ekuilibri? A patëm deklaratë si kjo nga SHBA-ja pas kidnapimit ilegal të tre zyrtarëve policorë nga Serbia? Jo. Heshtja për sulmin terrorist në Banjskë mbetet shurdhuese”, ka shkruar Kearns.

Hovenier gjatë së shtunës ka akuzuar Kosovën për nxitje të tensioneve pas aksioneve të Policisë së Kosovës për mbylljen e zyrave të strukturave paralele në disa qytete të Kosovës.

“Qeveria e Shteteve të Bashkuara të Amerikës është thellësisht e shqetësuar për veprimet e fundit të autoriteteve të Qeverisë së Kosovës që kanë ndikim direkt dhe negativ në pjesëtarët e etnisë serbe dhe minoritetet tjera në Kosovë. Këto veprime janë duke rritur në mënyrë të panevojshme tensionet ndëretnike dhe si pasojë kufizojnë opsionet që Shtetet e Bashkuara të shërbejnë si avokuese efektive për Kosovën në arenën ndërkombëtare”, thuhet në deklaratën e Hovenierit.