Kolona në Gotthard, e gjatë 15 km

Fluksi i pushuesve që shkojnë drejt jugut, këtë vikend është më i madhi për këtë sezon prandaj kolona në orët e mëngjesit ka qenë më e gjata deri më tash

Vala më e re e pushimeve që në Zvicër ka filluar nga e premtja ka bërë që kolonat para tunelit në Gotthard të zgjaten deri në 15 kilometra. Afër tri orë mesatarisht është dashur të presin para tunelit udhëtarët me makina që ia kishin mësyrë jugut, gjegjësisht Italisë, pasi që ky vendkalim është pothuaj e vetmja mundësi për të kaluar në Itali e tutje.

Edhe dy javët e kaluara ishin formuar kolona të gjata para Gothardit por duket se këtë vikend fluksi i pushuesve që shkojnë drejt jugut do të jetë më i madhi për këtë sezon prandaj kolona në autostradën A2 në orët e mëngjesit të sotëm ka qenë më e gjata deri më tash. Javën e kaluar kolonat nga ana veriore e tunelit kanë qenë maksimalisht dhjetë kilometra të gjata, shkran srf.ch.

Por, edhe ata që kanë kaluar kolonën në veri, i pret një kolonë tjetër e gjatë në jug, para se të mbërrijnë në Chiasso.