Kolona të gjata në pikëkalimin e Bllacës

Qytetarët shprehen të habitur, por edhe të revoltuar me kontrollet e tepërta dhe të stërmundimshme nga ana e autoriteteve maqedonase

Qytetarët e Kosovës po përballën me pritje të gjata në pikëkalimin kufitarë të Bllacës që ndanë Kosovën me Maqedoninë, për shkak të  kontrolleve rutinore të policisë dhe doganierëve maqedonas. Gjatë vikendit rruga nga Prishtina për në Shkup nuk mund të kalohet më shpejt se 3 ose 4 orë.

Qytetarët shprehen të habitur, por edhe të revoltuar me kontrollet e tepërta dhe të stërmundimshme nga ana e autoriteteve maqedonase.

“Ora 12:00 jam nisur me familjen time nga Prishtina. Tashmë shkoi ora 15:00 unë akoma jam në kufi, në pritje për të realizuar vizitën time në Shkup. Mentalitet i poshtër Ballkanik. Derisa Evropa i ka hequr kufijtë, ne akoma nuk mund të lëvizim lirshëm”, citon INA, A.S. (39)  nga Shkupi, i cili pasluftës së Kosovës jeton në Prishtinë.

Ndërkaq, pritjet e gjata u shkaktojnë telashe edhe kompanive të autobusëve, të cilat mbajnë linjat e rregullta Shkup- Prishtinë dhe anasjelltas.

“Sot në mëngjes kisha vetëm gjashtë udhëtarë, ndërsa u detyrova të presë më shumë se gjysmë ore në kufi. Ky trajtim mund të jetë i qëllimshëm, ose nga padituria e disa policëve të punësuar nga partitë politike, të cilët s’dinë çka i thonë kompjuterit. Pritjet e gjata na shkaktojnë humbje të mëdha”, ka thënë shoferi i autobusit “Gazmendi Tours”.

Pritjet e gjata në kufirin e Bllacës i kanë raportuar edhe vetë autoritetet maqedonase. Sipas tyre, gjatë vikendit qarkullimi i veturave është me intensitet të shtuar për shkak të numrit të madh të kosovarëve të cilët vijnë në Maqedoni.

Edhe për banorët e Maqedonisë, të cilët kanë lidhje farefisnore me Kosovën, ditët e vikendit janë bërë të tmerrshme për kalim.

Kosova dhe Maqedonia kanë vetëm dy pikëkalime kufitare. Njëra është në Bllacë në magjistralen Prishtinë-Shkup dhe tjetra nëpër Malet e Sharrit, që lidhë Tetovën me Ferizajn dhe Prishtinën.

Është paraparë edhe një pikëkalimi tjetër në Stançiq të Karadakut, që  lidhë Gjilanin me Kumanovën, por ka disa vite që po zvarritet nga autoritetet maqedonase, edhe pse nga ana e Kosovës gjithçka është
gati.