Komision parlamentar për diasporën dhe mërgatën

Ministria e Diasporës propozoi formimin e Komisionit parlamentar për Diasporë dhe Mërgatën. Qeveria e miratoi këtë propozim dhe ia përcolli Kuvendin për procedim

Qeveria e Kosovës miratoi propozim-vendimin e Ministrisë së Diasporës që t’i rekomandohet Kuvendit të Republikës së Kosovës, themelimi i Komisionit të veçantë Parlamentar për Diasporë dhe Mërgatë. Këtë propozim e ngritë në mbledhjen e qeverisë, ministri i Diasporës, Valon Murati.

Ky propozim është votuar unanimisht, ndërsa kryeministri Isa Mustafa e përcolli për kuvend këtë miratim, me rekomandimin që të themelohet edhe një komisionin parlamentar për diasporën dhe mërgatën.

“Qëllimi i krijimit të këtij komisioni është promovimi dhe avancimi i të drejtave politike dhe sociale të diasporës, që është një nga prioritetet e Strategjisë së Diasporës dhe Mërgatës, e hartuar nga Ministria e Diasporës dhe e miratuar nga Qeveria e Kosovës”, thuhet në njoftim.

Gjithashtu, me këtë komision do të arrihet një përfaqësim më i madh i diasporës në vendimmarrje, objektiv strategjik ky jo vetëm i Ministrisë së Diasporës por edhe i Qeverisë së Republikës së Kosovës.