Kompanitë nga Kosova promovohen në Portugali

Ministria e Industrisë, Ndërmarrësisë dhe Tregtisë (MINT), përkatësisht Agjencia për Investime dhe Përkrahjen e Ndërmarrjeve në Kosovë (KIESA), ka organizuar pjesëmarrjen e kompanive nga Kosova në panairin “Web Summit 2024”, që po mbahet në Lisbonë të Portugalisë nga data 11 deri më 14 nëntor 2024, përcjell albinfo.ch.

Kompanitë kosovare të pranishme në këtë panair janë: Mikkena Global J.S.C., Innovation Academy Sh.P.K, Quantix L.L.C, Stree L.L.C, Tretek Sh.P.K, Global CT Digital Kosovo Sh.P.K, IT Outsourcing Sh.P.K, Terra Agency dhe Universiteti për Biznes dhe Teknologji.

Kompanitë janë duke i promovuar produktet dhe shërbimet që i ofrojnë në lëmin e teknologjisë informative, njëherësh po zhvillojnë kontakte me pjesëmarrës dhe partnerë potencialë me qëllim të krijimit të bashkëpunimit dhe rritjes së shërbimeve në sektorin e TIK-ut.

Stendën e Kosovës në “Web Summit” e ka vizituar znj. Edona Maloku- Bërdyna, ambasadore e Kosovës në Portugali. Mes tjerësh, stendën e Kosovës e ka vizituar edhe znj. Delina Ibrahimaj, ministre e Ekonomisë dhe Financave të Shqipërisë.

Kompanitë nga Kosova patën rastin ta vizitojnë edhe Ambasadën e Kosovës në Lisbonë, Portugali.

Në Lisbonë ka qëndruar edhe U.d. i Drejtorit të përgjithshëm të KIESA-s, z. Zef Dedaj, i cili ka marrë pjesë në ngjarjen “Corporate Innovation Summit”, që është mbajtur në Akademinë e Shkencave. Në dy tryezat e diskutimit me temat: “Transforimi i IA-së në ndërmarrje” dhe “Si po riformëson teknologjia procesin krijues në ndërmarrje”, z. Dedaj ka shpjeguar se si po zhvillohen këto dy instrumente të ICT në Kosovë si dhe ka folur për mundësitë që ofron vendi ynë në fushën e teknologjisë informative.