Konjufca: Gabim propozimi i Ramës, nuk kemi interesim ta shohim

Kryetari i Kuvendit të Kosovës, Glauk Konjufca ka reaguar disa ditë pas njoftimit nga ana e Kryeministrit të Shqipërisë, Edi Rama për propozimin e draft-statutit të Asociacionit të komunave me shumicë serbe.

“Askush nuk e ka parë atë draft. Pyeteni nënkryetarin e Kuvendit të Kosovës (Enver Hoxhaj)” ka thënë Kryetari i Kuvendit Glauk Konjufca.

I pyetur nëse do kërkojë Qeveria e Kosovës të shoh draftin ka thënë që jo.

“Nuk kemi interes me e pa sepse kjo është çështje e institucioneve të Kosovës. Sa i përket përmbajtjes së tij, lirisht kontaktojeni nënkryetarin e Kuvendit, ai tha që e ka pa. Kryeministri shqiptar tha që është sekret por nënkryetari jonë tha që e ka pa.”

Shumë drafte kanë qarkulluar deri tash por asnjëri nuk ka pasë ndonjë efekt në Republikën e Kosovës ka thënë tutje Konjufca, përcjell albinfo.ch.

I pyetur nëse do të ishte zgjidhje për situatën në veri ai tha se nuk mund të paragjykojë.

“Nuk mund të paragjykoj për përmbajtjen nuk e kam parë. Në parim mendoj që është gabim, pavarësisht përmbajtjes. Është një defekt parimor sepse kryeministri shqiptar nuk do të duhej të bënte veprime të tilla pa u  ulë me kryeministrin e Kosovës edhe pa i sqaru të gjitha këto probleme së bashku. Ata takohen shpesh por ky ishte veprim i njëanshëm”,është shprehur Konjufca, përcjell albinfo.ch.