Kosova demonstron gatishmërinë për NATO përmes ushtrimit “Defender Europe 2025”

Presidentja e Republikës së Kosovës, Vjosa Osmani, dhe kryeministri në detyrë, Albin Kurti, kanë deklaruar se pjesëmarrja dhe organizimi i ushtrimit ndërkombëtar “Defender Europe 2025” në territorin e Kosovës është dëshmi e qartë e gatishmërisë së vendit për anëtarësim në NATO, raporton albinfo.ch.

Gjatë vizitës së tyre në zonën stërvitore në Babaj të Bokës, Osmani theksoi se Kosova është e përgatitur të kontribuojë në misione ndërkombëtare, në cilësinë e një shteti të barabartë dhe anëtar të NATO-s.

“Jemi të gatshëm jo vetëm të kontribuojmë në operacione të tilla, por njëkohësisht të jemi shtet i barabartë dhe shtet anëtar i NATO-s. Dua t’i falënderoj gjeneralët e SHBA-së që janë jo vetëm sot, por që janë një kohë të gjatë me ushtarët tanë në trajnime e përgatitje”, deklaroi presidentja Osmani.

Ajo e cilësoi ushtrimin “Defender 25” si një dëshmi të fuqishme të aleancës së qëndrueshme mes Kosovës dhe Shteteve të Bashkuara të Amerikës.

Nga ana tjetër, kryeministri në detyrë, Albin Kurti, tha se ky ushtrim ndërkombëtar konfirmon aftësinë operacionale të Forcës së Sigurisë së Kosovës dhe vullnetin për të kontribuar në sigurinë rajonale dhe globale.

“Në këtë rast konkretisht, Republika e Shqipërisë, Kroacisë, Maqedonisë së Veriut dhe Bullgarisë, bashkë me ne, kemi arritur të tregojmë dhe demonstrojmë fuqinë tonë për veprueshmërinë që e kemi me NATO-n. Në këtë mënyrë e forcojmë kauzën tonë se anëtarësimi i Kosovës në NATO nuk është vetëm për dobi të vendit tonë, por edhe për kontributin që jemi në gjendje të japim”, u shpreh Kurti.

Ai njoftoi gjithashtu se në këtë ushtrim kanë marrë pjesë 29 shtete, ndërsa për zhvillimin e tij janë shpronësuar rreth 4000 hektarë tokë, të cilat tashmë janë në pronësi të Ministrisë së Mbrojtjes së Kosovës.

“Defender Europe 2025” konsiderohet si një ndër stërvitjet më të mëdha ushtarake të mbajtura ndonjëherë në Kosovë, duke përforcuar pozitën e vendit në partneritetin me aleatët ndërkombëtarë dhe duke theksuar aspiratat e saj për integrim të plotë në strukturat euroatlantike, transmeton albinfo.ch.