Kosova dhe Shqipëria në fokus të festivalit „Off Europa“ në Gjermani

Shfaqjet nga Kosova dhe Shqipëria kanë zënë vend në repertorin e këtij festivali, i cili do të fillon më 17 shtator në Lajpcig dhe Dresden

Kosova dhe Shqipëria do të jenë dy vendet në fokus të edicionit të sivjetmë të festivalit „Off Europa“, i cili fillon më 17 shtator dhe mbahet në Lajpcig dhe Dresden të Gjermanisë. Këtë edicion, të njëzetin me radhë kanë zënë vend në repertorin e këtij festivali shfaqjet nga Shqipëria dhe Kosova.. Në faqen zyrtare të festivalit “Off Europa“, thuhet se këtë vit kanë planifikuar të ofrojnë informata nga Shqipëria nëpërmjet skenës së artit dhe shfaqjeve nga një vend që është pothuajse i panjohur.

Por sipas organizatorëve të festivalit do të ishte i pa plotë prezantimi i të dhënave nga Shqipëria pa e përfshirë edhe Kosovën.  „Jo vetëm në art por dy vendet janë shumë të ngjashme“, shkruan në faqen zyrtare të „Off Europa“.. “Kanuni”, me regji të Agnes Nokshiqit, realizuar në vitin 2005, është shfaqja që do të përfaqësojë teatrin kosovar në festivalin “Off Europa”. Shfaqja në fjalë figuron në programin e festivalit  se do të jepet para publikut gjerman më 18 shtator në Leipzig.

Në përfaqësim të Shqipërisë, në këtë festival do të zënë vend shfaqjet nga teatri shqiptar “Parfumi” dhe “Njeriu në këllëf “, dhe shfaqja nga teatri “Enton Kaca”, me titull “ Udhëtimet e Lizës”.

Krahas shfaqjeve, programi i titulluar „univers shqiptar“ do të përcillet edhe me shfaqje filmash, koncerte, ligjërata dhe debate. Këngëtarja e njohur Elina Duni do të mbajë një koncert gjatë netëve të festivalit, ndërsa pjesë e tij do të jetë edhe Ermira Çitaku.Festivali “Off Europa” është themeluar në vitin 1992 në Lajpcig dhe iu kushtohet kryesisht kombeve ose shteteve të caktuara. Gjatë viteve të shkuara ka vënë në pah situatën e teatrin bashkëkohor të Rumanisë, shteteve të Baltikut, Gjeorgjisë dhe të disa shteteve të dala nga ish – Jugosllavia.

Programi i Festivalit “Off Europa” 2011:

http://www.bfot.de/festival/program.html