Kosova hap dyert për investime në turizëm

Në konferencën “Dita e Turizmit Austriako-Kosovar 2015” ministrja e MTI-së, Hykmete Bajrami iu bërë thirrje vendorëve e ndërkombëtarëve të investojnë në turizëm

Të dhënat statistikore të Agjencisë së Statistikave të Kosovës, tregojnë se rreth 20 mijë  persona janë të punësuar në sektorin e akomodimit dhe ushqimit, që përfaqësojnë mbi 5 për qind të të gjithë personave të punësuar në Kosovë. Kështu deklaro ministrja e Tregtisë dhe Industrisë, Hykmete Bajrami e cila iu bërë thirrje afaristëve vendorë e ndërkombëtarë të investojnë në turizëm.

Këto komente ajo i bëri në konferencën e organizuar nga Shoqëria Austriake-Kosovare në mbështetje të Projektit PPSE (Swiss Contact) dhe Odës Ekonomike Austriake si dhe Universitetit për Biznes dhe Teknologji (UBT), me temën: “Dita e turizmit Austriako-Kosovar 2015”.

Organizimi i këtij takimi, sipas Bajramit, është i mirëseardhur për promovimin e vlerave turistike të Kosovës, si dhe ofron mundësi për krijimin e rrjetëzimeve në mes të bizneseve kosovare dhe të atyre austriake.

“Në këtë kuadër shkëmbimi i përvojave dhe përfitimeve nga modeli austriak për promovimin e turizmit, është i një rëndësie të veçantë për zhvillimin e turizmit në Kosovë”, tha ministrja Bajrami.

Ajo po ashtu theksoi se Qeveria e Kosovës e konsideron turizmin si një nga mundësitë për zhvillimin e vendit.

Ministrja e MTI-së po ashtu ka thënë se turizmi, pa mëdyshje, është një sektor i rëndësishëm në Kosovë, i cili jo vetëm krijon shumë shpejtë vende të punës, por është gjithashtu një mundësi për përmirësimin e imazhit të Kosovës si shteti më i ri në Evropë, imazhi që korrespondon në mënyrë autentike me karakteristikat specifike dhe asetet unike të Kosovës.

Ministrja e MTI-së, Hykmete Bajrami, po ashtu theksoi se Qeveria e Kosovës po punon në ngritjen e kapaciteteve njerëzore në fushën e turizmit, në mënyrë që të vazhdohet me ofrimin e shërbimeve cilësore, si dhe hartimin e politikave për promovimin e turizmit vendor.

“Është hartuar Plani zhvillimor në sektorin e turizmit i cili është në fazën finale. Synimi ynë është që deri në vitin 2020, sektori i turizmit të marrë pjesë në GDP me 7-8 për qind, tha ministrja Bajrami, duke shtuar se është filluar me rishikimin e legjislacionit në fuqi, në mënyrë që të krijohet një ambient më i përshtatshëm për sektorin privat.

Ministrja e MTI-së, i ka bërë thirrje operatorëve turistik kosovar që të orientojnë lëvizjet turistike dhe krijimin e ofertave, në prurjen e turistëve nga vendet tjera në Kosovë si dhe ofrimin e paketave brenda Kosovës për vendorët, dhe të mos fokusohen vetëm në ofertat për vizita jashtë vendit.