Kosova kërkon mbështetjen e anesteziologëve të pensionuar

Në kohën kur është ngritur alarm për mungesën e anesteziologëve dhe ikjen e stafit shëndetësor jashtë vendit, sytë janë kthyer kah doktorët e pensionuar

Ministri i Shëndetësisë i Kosovës, Rifat Latifi, priti sot një grup të anesteziologëve të pensionuar, nga të cilët kërkoi mbështetje dhe ide kreative për ta ndihmuar fushën dhe shërbimet e anesteziologjisë, bazuar edhe në përvojat e tyre akademike dhe profesionale, transmeton Albinfo.ch.

Ministri Latifi u tha anesteziologëve se sistemi shëndetësor i Kosovës, e sidomos Qendra Klinike Universitare e Kosovës, ka nevojë për një riorganizim të duhur, me theks te shërbimet e anesteziologjisë, ku ka mungesë kuadri.

Bashkëbiseduesit u dakorduan se me punë të përbashkëta ekipore dhe me kontributin dhe përvojën edhe të atyre që ende mund të kontribuojnë, mund të bëhen ndryshime dhe të përmirësohen shërbimet dhe gjendja në shëndetësi.

“Anesteziologët e pensionuar u shprehën të gatshëm për të mbështetur ministrin Latifi dhe angazhimet për përmirësimin e gjendjes dhe shërbimeve në shëndetësi”, njofton zyra për media e Ministrisë së Shëndetësisë.

---