Kosova me shkallë të ulët të kredive joperformuese

Sistemi bankar vazhdon të ketë një performancë të mirë, ka rritje të depozitave, rritje të kreditimit si dhe ulje të lehtë të normës së kamatave në kreditim.

Bedri Hamza, guvernator i Bankës Qendrore të Kosovës i ka thënë shefit të zyrës dhe përfaqësuesit Special të BE-së për Kosovë, Samuel Zhbogar se sistemi bankar në Kosovë po tregon një performancë të mirë, ka rritje të depozitave, rritje të kreditimit si dhe ulje të lehtë të normës së kamatave në kreditim. Këto janë deklaruar gjatë një vizite që Zhbogar i bëri Bankës Qendrore të Kosovës.

“Aktualisht të gjitha bankat janë mirë të kapitalizuara dhe janë likuide dhe kanë përqindje të adekuatshmërisë së kapitalit mbi normën e kërkuar sipas standardeve ndërkombëtare, ka thënë Hamza.

Ai i tha Zhbogarit se në Kosovë ka shkallë të ulët të kredive joperformuese e cila vazhdon të jetë më e ulëta në rajon, shkruan gazetaexpress.com.

Ata të dy bashkë, janë pajtuar që të shtojnë bashkëpunimin në sfera të ndryshme si në hartimin e rregullativës ligjore, apo rishikimin e rregullativës aktuale dhe forcimin dhe shtimin e përkrahjes në fusha tjera si në gjetjen e mënyrave që përmes sistemit bankar të ndihmohen bizneset në Kosovë, me theks të veçantë lëmia e agrokulturës, në mënyrë që të ulën normat e kamatave për individët dhe bizneset që merren më këto veprimtari.