Kosova në ekspozitën e hortikulturës në Turqi

Në Ekspozitën e Hortikulturës “EXPO 2016” që fillon nesër në Antali të Turqisë edhe Kosova do të ketë pavijonin e saj.  Kjo ekspozitë do të qëndrojë e hapur për 6 muaj gjatë këtij viti dhe në të do të marrin pjesë mbi 40 shtete, të cilat do të promovojnë veten përmes formave të ndryshme.

Ministri i Bujqësisë, Pylltarisë dhe Zhvillimit Rural, Memli Krasniqi do të marrë pjesë në hapjen e ekspozitës, si dhe të pavijonit të Kosovës.
Aty do të marrin pjesë edhe ministra e përfaqësues shtetesh që marrin pjesë në ekspozitë, shkruan telegrafi.com.

Hapja qendrore do të bëhet nga presidenti i Turqisë, Recep Tayyip Erdogan. Sipas organizatorëve, afër 8 milionë njerëz do ta vizitojnë ekspozitën gjatë gjithë kohës sa do të qëndrojë e hapur.

Kjo është hera e dytë gjatë këtij viti që bujqësia e Kosovës apo nënsektorë të saj promovohen në panaire të mëdha botërore. Në janar të këtij viti Kosova prezantoi prodhimet e veta në panairin Green Week në Gjermani.