Kosova përfiton mbi 130 milionë euro fonde

Zëvendëskryeministri i parë i Kosovës, Besnik Bislimi, ka bërë të ditur se me miratimin në Qeveri të nismës për marrëveshjet financiare për IPA 2021, IPA 2022 dhe IPA III, Kosova përfiton mbi 130 milionë euro fonde nga Bashkimi Evropian, përcjell albinfo.ch.

“IPA III do shërbejë si marrëveshje kornizë që Kosova të përfitojë nga fondet e BE-së të ofruara në kuadër të Instrumentit të Para-anëtarësimit për programet vjetore IPA 2021-2027. Nga programet vjetore IPA 2021 dhe IPA 2022, Kosova përfiton përkatësisht 63.96 milionë për IPA 2021 dhe 70.25 milionë euro nga IPA 2022”, ka shkruar Bislimi në Facebook.

Këto fonde, sipas tij, do shërbejnë për zbatimin e projekteve si deminimi, përkrahja për komunat, instrumenti i përafrimit me BE-në, përkrahja për mjedisin, tregtia dhe tregu i brendshëm dhe përkrahja për bujqësinë dhe zhvillimin rural, kthimi dhe riintegrimi i komuniteteve, përkrahja për profesionet e lira në Kosovë, energjia e gjelbër dhe efiçienca e energjisë, ekonomia qarkore dhe menaxhimi i mbeturinave, ujërat e zeza dhe zhvillimi gjithëpërfshirës socio-ekonomik.

“Përveç IPA III, synojmë më tej edhe përfitime nga fonde të tjera si WBIF (Western Balkans Investment Framework), të cilat garantojnë zhvillimin, menaxhimin dhe implementimin e politikave të ndërmarra dhe përmbushjen e kritereve të përcaktuara në sektorë të ndryshëm”, ka shkruar tutje Bislimi.