Kosovarët kryesojnë listën e qytetarëve me shtetësi të dyfishtë në Zvicër

Mbi 90% e kosovarëve në Zvicër mbajnë dy shtetësi.

Sipas statistikave zyrtare, plot 91.7 për qind e kosovarëve të natyralizuar në Zvicër vazhdojnë të mbajnë edhe shtetësinë e origjinës, duke i renditur ata në vendin e parë mes të gjitha komuniteteve të huaja në vend, shkruan albinfo.ch.

Vlen të theksihet se shtetësia e dyfishtë po bëhet gjithnjë e më e zakonshme në Zvicër, ndërsa kosovarët renditen në krye të komuniteteve që ruajnë njëkohësisht shtetësinë e origjinës edhe pas marrjes së pasaportës zvicerane.

Sipas të dhënave zyrtare që u publikuan dje nga Zyra Federale e Statistikave të Zvicrës (FSO), në vitin 2024, 21 për qind e qytetarëve zviceranë mbanin të paktën një shtetësi shtesë. Kjo përqindje ka shënuar rritje të vazhdueshme ndër vite, në vitin 2010 ajo ishte vetëm 14 për qind.

Mbi 90% e kosovarëve ruajnë shtetësinë e Kosovës

“Në mesin e qytetarëve të natyralizuar, kosovarët kryesojnë bindshëm, pasi 91.7 për qind e tyre mbajnë edhe shtetësinë e Kosovës, duke u renditur të parët në Zvicër për nga shkalla e binacionalitetit”, sipas FSO.

Kjo shifër tejkalon ndjeshëm komunitetet e tjera, përfshirë ata nga Serbia, Maqedonia e Veriut, Portugalia apo Gjermania, dhe tregon lidhjen e fortë që diaspora kosovare ruan me vendin e origjinës, shkruan tutje albinfo.ch.

Në vijim renditen:

Portugalët – 82.3%

Gjermanët – 72.9%

Spanjollët – 60.2%

Britanezët – 58%

Italianët – 55.5%

Francezët – 45.1%

Dallime të theksuara mes rajoneve të Zvicrës

Të dhënat tregojnë edhe dallime të mëdha rajonale në përhapjen e shtetësisë së dyfishtë:

Zvicra frëngjishtfolëse: 31%

Zvicra italishtfolëse (Ticino): 30%

Zvicra gjermanishtfolëse: 17%

Këto dallime lidhen kryesisht me strukturën demografike dhe historinë e migrimit në secilin rajon.

Të dhëna nga sondazhi më i madh kombëtar

Statistikat bazohen në Sondazhin Strukturor, sondazhi më i madh mbi popullsinë dhe strukturën familjare në Zvicër. Ky sondazh plotëson të dhënat nga regjistrat kantonalë dhe komunalë të popullsisë, si dhe nga regjistri federal i ndërtesave dhe banesave.

Rezultatet e tij shërbejnë si bazë për politikat publike, kërkimin shkencor dhe planifikimin ekonomik, ndërsa të dhënat fillestare publikohen zakonisht një vit pas periudhës referente. /Albinfo.ch

---