Kosovë: Më 6 maj nis regjistrimi i votuesve nga jashtë për votim me postë dhe përfaqësi diplomatike

Komisioni Qendror i Zgjedhjeve ka bërë të ditur se më 6 maj 2026 fillon procesi i regjistrimit të votuesve nga diaspora, i cili do të zgjasë deri më 17 maj.

Gjatë një periudhe 12-ditore, të gjithë shtetasit e Kosovës që jetojnë jashtë vendit do të kenë mundësi të aplikojnë online për t’u regjistruar dhe për të zgjedhur mënyrën e votimit: me postë ose në përfaqësitë diplomatike.

Zëdhënësi i KQZ-së, Valmir Elezi, ka theksuar se secili votues mund të zgjedhë lirisht mënyrën e votimit.

Ai sqaroi se qytetarët mund të votojnë fizikisht në përfaqësitë diplomatike, të dërgojnë fletëvotimin me postë në kutitë postare të hapura jashtë vendit, ose ta dërgojnë atë në kutinë postare të KQZ-së në Kosovë.

Sipas KQZ-së, votimi në përfaqësi diplomatike do të zhvillohet më 6 qershor, ndërsa votimi përmes postës do të bëhet nga 25 maji deri më 6 qershor.

Po ashtu, është vendosur që votimi në një përfaqësi diplomatike të organizohet vetëm nëse regjistrohen të paktën 50 votues. Në të kundërtën, votuesit do të kalojnë automatikisht në votim përmes postës dhe do të njoftohen nga KQZ.

KQZ ka bërë të ditur gjithashtu se emrat e qytetarëve të regjistruar për votim nga diaspora do të hiqen nga listat e votimit në vendvotimet brenda Kosovës, për të shmangur dyfishimin e votës.