Kosovë: Temperatura të larta, thirrje për të shmangur ekspozimin në diell gjatë ditës

Kosova do të përballet sot me një ditë kryesisht me diell dhe temperatura të larta verore, sipas parashikimit nga Instituti Hidrometeorologjik i Kosovës (IHMK), raporton albinfo.ch.

Temperaturat minimale pritet të lëvizin nga 13 deri në 16 gradë Celsius, ndërsa ato maksimale do të arrijnë nga 31 deri në 35 gradë, varësisht nga regjioni. Kjo valë nxehtësie shoqërohet edhe me një indeks të lartë të rrezatimit ultraviolet (UV), i cili paraqet rrezik të shtuar për shëndetin.

IHMK këshillon qytetarët që të shmangin ekspozimin direkt në rrezet e diellit nga ora 9:00 deri në 17:00, kohë kur rrezatimi është më intensiv. Personat më të rrezikuar janë të moshuarit, fëmijët dhe ata që vuajnë nga sëmundje kronike.

Instituti apelon për kujdes të shtuar, veshje të lehta dhe përdorim të kremrave mbrojtës, sidomos për ata që qëndrojnë më gjatë jashtë gjatë ditës, raporton albinfo.ch.