Kosovë: Transporti hekurudhor, ajror dhe telefonia mobile shënojnë rritje

@unsplash

Agjencia e Statistikave të Kosovës ka publikuar raportin mujor të transportit dhe telekomunikimit për shtator të së cilit tregohet rritje e dukshme në trafikun ajror, hekurudhor dhe në shërbimet e telefonisë mobile, ndërsa vërehet rënie e lehtë në trafikun e telefonisë fikse.

Gjatë shtatorit 2025 janë realizuar 1,196 fluturime, që paraqet një rritje prej 7,3% krahasuar me shtatorin 2024. Numri total i udhëtarëve ka arritur në 374,982, duke shënuar një rritje prej 8,9% në raport me vitin paraprak. Udhëtarë në ardhje: 165,570 (+8,8%), udhëtarë në shkuarje: 209,412 (+9,0%), transmeton albinfo.ch.

Bëhet e ditur se në sektorin hekurudhor, gjatë shtatorit 2025 janë regjistruar 8,218 udhëtarë, një rritje prej 59,5% krahasuar me shtatorin 2024, ndërsa, transporti i mallrave ka qenë zero për këtë muaj.

Numri i përdoruesve të rrjetit telefonik fiks ka arritur në 68,091, një rritje shumë e lehtë prej 0,1% krahasuar me periudhën e njëjtë të vitit të kaluar. Megjithatë, trafiku i realizuar në këtë rrjet ka rënë në 1,962,842 minuta, që përfaqëson një ulje prej 2,2%.

Sa i përket telefonisë mobile, është shënuar rritje në përdoruesit Prepaid dhe Postpaid. Përdoruesit me parapagim (Prepaid): 1,682,992 (+0,38%), përdoruesit me kontratë (Postpaid): 321,338 (+3,26%)

Sipas të dhënave nga ASK, vërehet rritje e vazhdueshme të mobilitetit të qytetarëve, veçanërisht në transportin ajror dhe përdorimin e telefonisë mobile, ndërsa shërbimet fikse të komunikimit mbeten në rënie të lehtë. ASK do të vazhdojë monitorimin periodik për të pasqyruar trendet e zhvillimit në këta sektorë.