Kosovë: Vdes nga COVID-19 edhe një 56-vjeçar, punonte në KEK

Ka vdekur edhe një pacient 56-vjeçar, i prekur me COVID-19 në Kosovë, i cili ishte punëtor në KEK.

Lajmin e ka bërë të ditur Korporata Energjetike e Kosovës përmes një njoftimi.

Në njoftim thuhet se viktima ishte nga fshati Vasilevë, ndërsa varrimi i tij u bë sot rreth orës 17:00.

“Të nderuar kolegë, ju njoftojmë se sot ndërroi jetë Fatmir Berisha (56-vjeçar), punëtor në Mihje-KEK. Ishte njeri human dhe aktivist i devotshëm i Sindikatës, por vdekja misterioze e rrëmbeu papritmas. Fatmiri ishte ndër punëtorët shembullorë të KEK-ut, por në radhë të parë ishte një njeri i dashur dhe shumë i respektueshëm, si ndër kolegë, shokë dhe miq. Fatmiri ishte i prekur nga virusi COVID 19. Varrimi bëhet sot në ora 17 në Vasilevë. Ngushëllime familjes, kolegëve, miqve dhe të gjithë atyre që e kishin njohur”, thuhet në njoftim.

Numri të vdekurve si pasojë e koronavirusit në Kosovë ka shkuar në 131. Ndërsa, Instituti Kombëtar i Shëndetësisë Publike ka bërë të ditur se në 24 orët e fundit janë shënuar edhe 145 raste pozitive me këtë virus.