KQZ ka shpallur fitues Bashën

Përfaqësuesit e opozitës kanë kundërshtuar vendimin duke kërkuar kohë për të parë tabelat përmbledhëse të 485 qendrave të votimit

Të hënën pas orës 21. Komisioni Qendror i Zgjedhjeve ka shpallur kandidatin e mazhorancës Lulzim Basha, fitues të zgjedhjeve për bashkinë e Tiranës. Vendimi është miratuar me katër vota pro dhe dy vota kundër të përfaqësuesve të opozitës.

Sipas llogaritjeve të KQZ-së Lulzim Basha ka 81 vota më shumë se kandidati i opozitës Edi Rama.

Vendimi për tabelën përmbledhëse për Tiranën u miratua pas debateve dhe miratimit tabelës përmbledhëse të KZAZ-së 49 në Tiranë dhe projekt-aktit që parashikon përllogaritjen e fletëve të hedhura në kutitë e gabuara, të numëruara nga KQZ-ja gjatë kësaj jave.

Përfaqësuesit e opozitës kundërshtuan vendimin duke kërkuar kohë për të parë tabelat përmbledhëse të 485 qendrave të votimit dhe duke thënë se ka mos-përputhje shifrash midis numrit të votuesve dhe numrit të votave.

Opozita ka kundërshtuar në vazhdimësi numërimin e votave të hedhura në kutitë e gabuara, duke kërkuar që ato të trajtohen si të pavlefshme. Përfaqësuesit e opozitës e kanë konsideruar edhe aktin e KQZ-së për miratimin e këtyre votave, të paligjshëm. Opozita pritet ta apelojë vendimin e KQZ-së për Tiranën në Kolegjin Zgjedhor.