Kreuzlingeni me shumë hendbollistë shqiptarë largohet nga Superliga zvicerane

Ky klub zyrtarisht është larguar nga Superliga dhe kishte tetë hendbollistë shqiptarë

Është e çuditshme, por e vërtetë: klubi zviceran Kreuzlingen u largua vullnetarisht nga Superliga zvicerane, përcjell albinfo.ch.

Blick i ka kushtuar klubit një artikull për vendimin e tij dhe për mënyrën se si shumë hendbollistë do të nisin transfere të reja.

Vlen të theksohet se ky klub kishte pesë hendbollistë të rëndësishëm të Kosovës dhe tri hendbolliste të njohura të përfaqësueses së Kosovës.

Në edicionin 2024/2025, Kreuzlingen ishte njëri nga dy klubet e vetme që kishte ekipin e djemve dhe atë të vajzave në Superligën e Zvicrës.

Por në edicionin e ardhshëm nuk do të jetë në elitë me asnjërin ekip.

Hendbollistët ndër më kryesorët ishin shqiptarë: kapiteni Valon Dedaj, lojtari kryesor i mbrojtjes Bujar Ramosaj, portieri i parë Haris Berisha, krahu i djathtë Drilon Tahirukaj dhe krahu i majtë Drenit Tahirukaj. Pjesë e klubit ishin edhe tri hendbolliste të rëndësishme të Kosovës: Albina Rugova, Fitore Aliu dhe Dafina Mustafa.

Sipas Blick, ajo që ndodhi duket e pazakontë, por është vetëm kapitulli i tretë i riorientimit të klubit. /Albinfo.ch

---