Krijohen kolona në Jarinje, serbët udhëtojnë për të votuar

Luan Gacaferi, FB

Dhjetëra autobusë me qytetarë serbë janë nisur sot në mëngjes nga veriu i Mitrovicës për në Serbi, ku do të votojnë në zgjedhjet parlamentare, të cilat po mbahen atje.

Një pjesë e tyre përmes transportit të organizuar janë nisur pas orës 6:00 nga stacioni i autobusëve në veri të Mitrovicës, pastaj grupi tjetër në 7:30 dhe organizime do të ketë pothuajse çdo orë deri në mesditë.

Afër stacionit të autobusëve ka pasur patrullime të vazhdueshme të pjesëtarëve të Policisë së Kosovës me automjetet e tyre, por edhe të EULEX-it dhe KFOR-it.

Për t’iu shmangur tollovisë, ka edhe lokacione të tjera prej nga kanë udhëtuar, siç janë spital i përgjithshëm në veri të Mitrovicës, ndërmarrja Trepça në Zveçan etj., derisa shumë prej tyre kanë vendosur të shkojnë edhe me automjete private.

Qytetarët nga veriu i Mitrovicës, Zveçanit dhe Leposaviqi do të votojnë në Rashkë, ata nga Zubin Potoku në Tutin, ndërsa do të ketë qendra të votimit edhe në Kurshumli e Vranje, ku do të mund të votojnë serbët nga komunat e tjera të Kosovës, varësisht prej cilit qytet vijnë, përcjell albinfo.ch.

Mësohet se autobusët me targa BG, NP, RKS etj., të cilët po transportojnë votuesit kanë krijuar kolona në pikën kufitare të Jarinjes, ndërsa në Bërnjak situata është më e qetë.

Sipas Qendrës Kombëtare të Menaxhimit Kufitar, ka pritje deri në dy orë për të dalë nga Kosova nëpërmjet pikës kufitare Jarinje, shkruan Koha.net.