Tri koalicione parazgjedhore në Shqipëri, PS vazhdon e vetme

Zhvillime rreth zgjedhjeve të 25 prillit në Shqipëri

Është bërë e ditur se “PD-Aleanca për ndryshim’, ‘Aleanca Ora Kombëtare Emigracioni, Bashkimi Popullor dhe Konservatorët” dhe ‘Aleanca‘ janë tre koalicionet të cilat paraqitën ditën e djeshme listat e tyre në KQZ për zgjedhjet e 25 prillit 2021, përcjell albinfo.ch.

“Aleanca për ndryshim” është koalicioni i i krijuar nga Partia Demokratike dhe aleatët e saj, që do të garojnë me një listë të përbashkët në zgjedhjet e 25 prillit. Basha mblodhi aleatët e tij përgjatë gjithë ditës së djeshme, ditë e cila përkoi me afatin e fundit të dorëzimit të kërkesës në KQZ, me të cilët firmosi edhe koalicionin.

Pjesë e këtij koalicioni do të jetë PR e Fatmir Mediut, LZHK-ja e Dashamir Shehit, FRD e Bamir Topit, PAA e Agron Dukës, PDK e Nard Ndokës, PBDNJ e Vangjel Dules, PDIU e Shpëtim Idrizit, Balli Kombëtar i Artur Roshit nga opozita parlamentare, PBLD e Arjan Starovës, PBD e Ylber Valterit, PLL e Shpëtim Axhamit dhe PKD e Dhimitër Muslias.

Pas dorëzimit të dokumentit në KQZ Basha, në një postim në Facebook u shpreh i bindur për fitoren në zgjedhje.

Kujtim Gjuzi që është bërë bashkë me Zef Shtjefnin, Selami Jenishehrin dhe Kostaq Papën që do të garojnë si koalicion me titullin kilometrik: “Aleanca Ora Kombëtare – Emigracioni – Bashkimi Popullor dhe Konservatorët”.Sigla e koalicionit është “AOKBPEK” ndërsa partitë përbërëse të këtij kolacioni janë: Partia Kombëtare Konservatore Albania; Partia Ora e Shqipërisë; Partia Emigracioni Shqiptar; Partia Bashkimi Popullor i Pensionistëve Shqiptar.

Koalicioni “Aleanca ka në përbërje 8 parti: Partia Aleanca për Barazi dhe Drejtësi Europiane, Partia me Aftësi të Kufizuara të Shqipërisë, Partia Lëvizja Punëtore Shqiptare, Partia e Reformuar Demokratike Shqiptare, Aleanca Demokratike Shqiptare, Aleanca për Demokraci dhe Solidaritet dhe Partia për Mbrojtjen e të Drejtave të Njerëzve.

LSI do të dalë me listë më vete, por në qarqet Dibër, Kukës dhe Gjirokastër dy partitë e mëdha opozitare do të kenë një listë të përbashkët.

Partia Socialiste ka bërë të qartë, përmes kryetarit Edi Rama, se nuk do të ketë asnjë aleancë politike për zgjedhjet e 25 prillit dhe PS do të garojë e vetme.

 

---