Krimi me AI në Schwyz: Miliona zhduken nga kompanitë

(KEYSTONE/Christian Beutler)

Një kompani nga kantoni Schwyz është viktimë e mashtrimit të njohur si “CEO fraud” gjatë dy javëve të fundit. Kriminelët përdorën një zë të gjeneruar nga inteligjenca artificiale për të mashtruar kompaninë dhe për të përvetësuar disa miliona franga zvicerane, transmeton albinfo.ch.

Policia kantonale e Schwyz dhe zyra e prokurorit kantonal kanë nisur një hetim. Sipas autoriteteve, autorët kontaktuan pronarin e kompanisë përmes telefonit, duke u prezantuar si një partner i njohur biznesi, ndërsa përdorën një zë të manipuluar nga inteligjenca artificiale.

Përmes këtij mashtrimi, kriminelët fituan besimin e pronarit dhe nën pretekstin e një transaksioni konfidencial ndërkombëtar, e bindën atë të kryente disa transferta parash që arritën disa miliona franga zvicerane. Transfertat u kryen në një llogari bankare në Azi, dhe mashtrimi u zbulua vetëm pasi pagesat ishin përfunduar. Identiteti i autorëve mbetet i panjohur.

Udhëzimet e policisë kantonale për kompanitë:

Bëni kujdes të veçantë ndaj kërkesave për pagesa përmes telefonit ose mesazheve zanore, edhe nëse zëri tingëllon i njohur.

Zërat mund të imitohet bindshëm me inteligjencë artificiale.

Verifikoni gjithmonë urdhrat e jashtëzakonshëm ose urgjentë për pagesa përmes një kanali komunikimi të dytë dhe të pavarur.

Zbatoni gjithmonë parimin “katër sysh” dhe procese të qarta miratimi për shuma të mëdha parash.

Mos kryeni transferta ndërkombëtare pa autorizim të verifikuar dhe dokumentuar.

Raportoni menjëherë çdo incident të dyshimtë tek banka dhe policia.

Hetimi i autorëve vazhdon, ndërsa autoritetet paralajmërojnë kompani të tjera për rreziqet e përdorimit të zërit të gjeneruar nga AI në mashtrime financiare.