Kriza ekonomike, shqiptarët braktisin Greqinë dhe Italinë

Rreth 134 mijë emigrantë janë kthyer në Shqipëri përgjatë periudhës 2009-2013 nga Greqia dhe Italia

Një studim i Institutit të Statistikave dhe Organizatës Ndërkombëtare për Migracionin IOM tregon se kriza e thellë në ekonominë greke dhe stagnimi i gjatë në ekonominë italiane, ka detyruar emigrantët shqiptarë që kanë humbur punën në këto vende të kthehen në shtëpitë e tyre.

Rreth 134 mijë emigrantë janë kthyer në Shqipëri përgjatë periudhës 2009-2013.  Bëhet fjalë për 10 për qind të shqiptarëve të emigruar pas viteve 90‘.

Ritmi i kthimeve është përshpejtuar pas vitit 2011 me rreth 1.5 herë. Mosha mesatare e emigrantëve të kthyer është 38.6 vjec’, thotë Gjergj Filipi, drejtor i INSTAT, transmetojnë mediat në Tiranë.

Sipas studimit, emigrantët e kthyer vijnë rreth 71 % nga Greqia dhe rreth 24 % nga Italia.

Mbi 60 % e tyre thonë se gjatë vitit të fundit të qëndrimit jashtë vendit, dërgesat në para për familjet në Shqipëri kanë qenë të pakta.

Shuma më e shpeshtë e këtyre dërgesave ka qenë 200 deri në 500 euro.

Sic raporton Top Channel një tjetër gjetje e studimit është se mbi 60 për qind e të kthyerve janë vendosur në të njëjtin vendbanim që kanë patur përpara se të emigronin, ndërsa pjesa tjetër në qendrat kryesore urbane si Tirana, Durrësi apo Vlora.

Një pjesë e madhe e tyre i janë drejtuar bujqësisë, si formë e vetëpunësimit, por edhe hapjes së bizneseve të vogla.

Sipas studimit, rreth 40 për qind e të kthyerve mendojnë se do të qëndrojnë në Shqipëri përgjithmonë ndërsa rreth 1/3 e shohin kthimin si të përkohshëm dhe synojnë të emigrojnë sërish.