Kroacia me mungesa ndaj Kosovës

Trajneri i Kroacisë, Ante Çaçic, ka folur përsëri për lëndimet e shumta që ka kombëtarja e tij. “Jam i befasuar me atë që ndodhi sa u përket lëndimeve. Shpresoj që lojtarët do të rikuperohen shpejt

Kroacia përballet me shumë mungesa ndaj Kosovës. Luka Modriqit, Dejan Lovrenit dhe Ivan Rakitiqit, iu shtua edhe Marko Pjaca, i cili po ashtu do të mungojë ndaj Kosovës, shkruan albinfo.ch.

Trajneri i Kroacisë, Ante Çaçic, ka folur përsëri për lëndimet e shumta që ka kombëtarja e tij. “Jam i befasuar me atë që ndodhi sa u përket lëndimeve. Shpresoj që lojtarët do të rikuperohen shpejt, të kthehen dhe të tregojnë paraqitje të mira me klubet e tyre”.

“Kroacia ka lojtarë tjerë cilësorë që mund t’i zëvendësojnë, veçanërisht në pozitat e mesfushës”, ka deklaruar ai për mediat kroate.

“Fatmirësisht luajmë ndaj dy ekipeve që janë më poshtë se ne. Unë besoj në këta që jemi, jemi mjaftueshëm për të arritur dy fitore”, ka shtuar Çaçiq.

Mesfushori i Kroacisë, Mateo Kovaçiq, ka folur për mediat para ndeshjeve ndaj Kosovës dhe Finlandës. Ai ka “vajtuar” mungesat që do të ketë Kroacia për këto dy ndeshje. “Kemi qenë të hendikepuar pa Modriq, Rakitiq dhe Lovren, andaj nuk na duhej aspak edhe Pjaca, i cili i jep kualitet skuadrës”, deklaroi Kovaçiq.

“Do të jetë vështirë ndaj Kosovës dhe Finlandës, por besoj që kemi kualitet për t’i fituar dy ndeshjet”, theksoi mesfushori i Real Madridit. Ai do të luajë nga minuta e parë kundër Kosovës.

Portieri kroat, Danijel Subasiq, thekson se nuk kanë njohuri për lojtarët e Kosovës. Ai ka dalë në konferencën për shtyp të martën, duke thënë se do të bëjnë çdo gjë për të fituar ndeshjen.

“Kosova është e gjitha e panjohur, por i kemi analizuar ata përmes videove, dhe kemi marrë atë që na nevojitet. Gjëja më e rëndësishme është të fokusohemi, dhe të japim 100 për qind që nga fillimi dhe të marrim tri pikë”, tha Subasiq në konferencën për shtyp.