Kroati ‘piu helm’ në Hagë, pasi u dënua me 20 vjet burg

Sllobodan Praljak, kroati i Bosnjës, ishte njëri nga gjashtë ish-liderët politikë e ushtarakë të kroatëve të Bosnjës që u paraqit para gjykatës në Hagë, raportojnë mediat ndërkombëtare.

Ai u dënua me 20 vjet burgim më 2013 për krime në Mostarin lindor. Me të dëgjuar se dënimi i tij u rikonfirmua, ai i tha gjykatësit, “Sapo kam pirë helm”, përcjell albinfo.ch.

Praljak u ngrit në këmbë dhe e ngriti dorën tek goja e tij, e lëkundi kokën prapa dhe u duk se përpiu një gotë me diçka në të, e që, sipas avokatit të tij, ishte helm, derisa lajmi nuk është konfirmuar zyrtarisht.

Gjykatësi menjëherë urdhëroi vendosjen e perdeve dhe seanca u pezullua. Lajme të tjera mbi shëndetin e tij nuk janë bërë të ditura, dhe nëse vërtet ka pirë helm, apo ishte diçka tjetër.