Kryebashkiaku francez përkrah fuqimisht familjen shqiptare

"Nuk ka më kuptim që shteti të na dërgojë familje që t`i dëbojmë dy vite më vonë", ka pohuar ai

Një familje shqiptare, me vendbanim në La Bouëxière, në afërsi të qytetit Rennes, që nga viti 2016 është vendosur në Francë. Më 9 prill të këtij viti, është paraparë që ajo të dëbohet nga territori francez.

Stéphane Piquet, kryebashkiaku i komunës i ka mobilizuar bashkëpunëtorët e tij dhe ndjekësit e tij në rrjetet sociale, përcjell albinfo.ch.

Stéphane Piquet, kryebashkiaku i La Bouëxière, komunë kjo me 4 258 banorë, e vendosur në mes të Rennes e Vitré, nuk i kursen fjalët. “Nuk ka më kuptim që shteti të na dërgojë familje që t`i dëbojmë dy vite më vonë”, ka pohuar ai. Kryebashkiaku është informuar se Myslim dhe Aniegka Sazexhiu, së bashku me tre fëmijët e tyre do të dëbohen me avion gjatë të hënës, për në Shqipëri.

“Të ardhur në Francë para një viti e gjysmë, këta migrantë kanë bërë gjithçka për t’u integruar. Babai kërkon vetëm të punojë dhe është vullnetarë në disa shoqata”.

Të përzgjedhurit, banorët dhe shoqatat i kanë shumëfishuar aksionet që para tre viteve për të pranuar familje të ndryshme.

“Ne nuk e kërkuam ekskluzivisht një gjë të tillë, mirëpo e bëjmë me qëllim të mirë. Përse pra këto veprime kontradiktore”, akuzon Stéphane Piquet në të përditshmen franceze “Ouest-France”, transmeton Albinfo.ch.

Ai i kishte shkruar në muajin janar prefektit për t’ia rikujtuar se një procedurë dëbimi është në rrjedhë e sipër. Kërkesa për dokumente e familjes shqiptare ishte refuzuar, njësoj sikurse edhe shumë të tjera. Familja Sazexhiu ka bërë ankesë, mirëpo ende nuk ka ndonjë përgjigje. “Problemi është se ky sistem nuk funksionon. Për vendime duhet të pritet shumë gjatë dhe në ndërkohë, jeta nuk ndalet. Familjet integrohen, ndërsa popullata investon”.

Kryebashkiaku ka bërë apel të drejtpërdrejtë për mobilizim në profilin e komunës në Facebook. Ai ka bërë ftesë për banorët e tij dhe të gjithë qytetarët që të vijnë gjatë kësaj të shtune në mëngjes, në komunë, për ta përkrahur familjen shqiptare Sazexhiu.

Edhe më herët ka pasur raste kur kryebashkiakët kanë dashur të përkrahin raste të tilla, por jo në radhë të parë. “Nuk e di nëse jam një militant, por nuk dua të qëndroj duarkryq”, përfundon me buzëqeshje Stéphane Piquet.

Lidhur me këtë rast vlen për t’u theksuar se Franca e vlerëson Shqipërinë si vend me origjinë të sigurt. Por, shoqata franceze “CNR” nuk është e të njëjtit mendim.

Vendet me prejardhje të sigurt, zakonisht janë vendet të cilat llogariten si të sigurta për mirëqenien e shtetasve të saj dhe banorët e saj nuk përndjekjen politikisht. Bashkimi Evropian, duke ndjekur politikën e saj të migrimit, në vitin 2015 Kosovën dhe Shqipërinë i shpalli si vende me prejardhje të sigurt, ndërsa Maqedoninë një vit më parë.

Tashmë, shoqata franceze “CNR” është në kërkim të elementeve të reja që dëshmojnë sigurinë e jetës së personave në këto shtete. Për këtë hap, ajo ka vendosur të hulumtojë pasi shumica e azilkërkuesve shqiptarë marrin përgjigje negative, edhe pse në të vërtetë jeta e tyre është e kërcënuar.

Sipas burimeve të sigurta, Franca së shpejti është duke përgatitur dëbimin e disa familjeve shqiptare, me pretekst se ata vijnë nga vende me prejardhje “të sigurt”.

 

---