Kryemadhi: Distancohuni nga dhuna, Rama po provokon tension

Kryetarja e LSI-së, Monika Kryemadhi, ka dënuar incidentin e ndodhur mbrëmë në KZAZ-në e Bushatit, në Bashkinë e Vaut të Dejës.
Kryemadhi shkruan në “Facebook” se asnjë mbështetës i LSI nuk ka lidhje me këtë ngjarje.

Sipas saj, djegia e materialeve zgjedhore në shkollën “Ndre Mjeda” në Bushat është provokim i Edi Ramës dhe Sandër Lleshajt, transmeton albinfo.ch.

“U bëjmë thirrje mbështetësve tanë, qindra mijëra qytetarëve të tjerë t’u qëndrojnë larg këtyre provokimeve të fëlliqura. Ne e njohim dhe jemi shumë mirë të informuar për planin kriminal të hartuar nga Edi Rama, personat e ngarkuar me emra të vërtetë dhe emrat e rremë, planet operative, kohën e fillimit e të mbarimit dhe që ka disa ditë që po tentohet të vihet në jetë, por edhe që do të demaskohet shumë rreptë nga ne”, ka shkruar ajo.