Kryetari i ri, Burkhalter, mbështetet në punën ekipore

Atë e presin projekte reformuese në planin e brendshëm dhe vendime të rëndësishme në të jashtmin. Ai ka përmendur nevojën për të sqaruar pozicionin lidhur me BE-në

Kryetar i Federatës së Zvicrës në mandatin njëvjeçar që fillon më 1 janar 2014 është zgjedhur ministri i punëve të jashtme, Didier Burkhalter. Ai i ka bërë me dieje të shtunën në një emision në radion SRF synimet që do t`i realizojë gjatë mandatit të tij. Ai ka theksuar se në radhë të parë do të ketë punën ekipore të qeverisë që do të marrë nën drejtim. “Ne do të paraqitemi shpeshherë nga dy e nga tre ministra” ka thënë ai, duke vënë theksin në nevojën për tu parë puna e përbashkët.

Sipas presidentit të ardhshëm Zvicra në vitin që vjen do të jetë arenë e ndryshimeve. Atë e presin projekte reformuese në planin e brendshëm dhe vendime të rëndësishme në të jashtmin. Si shembull ai ka përmendur nevojën për të sqaruar pozicionin lidhur me BE-në. Në këtë drejtim sipas Burkhalterit shtrohet një pyetje me rëndësi: “A mund të vendosë Zvicra edhe më tutje në mënyrë të mëvetësishme apo në vend të saj do të vendosë nje gjykatë e huaj. Është me rëndësi që Zvicra të mund të thotë edhe më tutje po ose jo në mënyrë sovrane”.  

Ndërkohë, BE-ja pret që Zvicra t`i zgjidhë çështjet e hapura me BE-në deri në vjeshtën e vitit 2014 që do të thotë brenda mandatit të presidentit të ri, Burkhalter.